ASNN – Xherdan Shaqiri realizoi një tjetër gol të hënën në Premier Ligë, në fitoren e thellë 4-0 të Liverpulit përballë Njukasëllit. Ishte një fitore me mjaft vlerë për trajnerin Jurgen Klop, pasi skuadra e Liverpulit shkon në 51 pikë, 6 më shumë se Totenhemi i vendit të dytë dhe 7 më shumë se Mançester Siti. Në këtë takim, shqiptari i përfaqësueses zvicerane, realizoi golin e 3-të, duke u konfirmuar jo vetëm si një futbollist i qëndrueshëm në lojë, por edhe si një golashënues.
Është e habitshme, por Shaqiri, i marrë në merkaton e verës nga Stoke Siti dhe i parë në ndeshjet e para në Premier Ligë si lojtar zëvendësues, ka shënuar 6 gola për Liverpulin në 14 ndeshje të aktivizuara. Ai ka realizuar edhe një gol në kupën e Ligës në Angli. E thënë ndryshe, Shaqiri ka rezultuar mjaft efikas, sidomos për pasimet ideale që ka dhënë dhe golat me peshë në ndeshje të mëdha siç ndodhi javën e kaluar ndaj Mançester Junajtid.
Aty ku realizoi dy gola në fitoren 3-1 e çoi në shkarkimin e Zhoze Murinjos. Shaqiri i ka shënuar 6 golat e tij në Premier Ligë në një hark kohor prej 700 minutave, pra në total në afërsisht 8 ndeshje të plota. E përkthyer ndryshe, ai realizon 1 gol në 115 minuta, pra afërsisht një gol për ndeshje. Këtë ritëm e ka vetëm Mohamed Salah, kështu që Shaqiri i lë prapa edhe sulmuesit e tjerë të Liverpulit. Një tjetër “armë” e fuqishme e shqiptarit janë pasimet për gol dhe fantazia në lojë.
“Shaqa” është një lojtar mbresëlënës për të krijuar raste goli dhe përveç 6 golave ka dhënë edhe 3 pasime për gol. Kjo ia shton vlerat dhe nuk është rastësi që trajneri Klop dhe të gjithë lojtarët pas ndeshjes nxitojnë ta lavdërojnë për punën që bën. Për krahasim, Firmino ka shënuar 4 gola në 19 ndeshje, kurse Sadio Mane 7 gola në 17 ndeshje. Pra Shaqiri me 6 gola në 14 ndeshje dhe me minutazh të limituar, pasi në disa ndeshje ka luajtur vetëm pak minuta si zëvendësues.
Me pak fjalë, ai është shndërruar në një “goleador” të vërtetë. Natyrisht, ylli i skuadrës edhe këtë sezon mbetet Mohamed Salah, me 12 gola në 19 ndeshje, teksa ka realizuar edhe 6 pasime goli.
