ASNN – 22-vjeçari Françesko Tahiraj, që u zhvendos para 4 vitesh nga Torino në Slloveni, ka ardhur duke e rritur çdo sezon paraqitjen e tij. Dhe në sezonin e 4-t në futbollin slloven, ai ka shpërthyer tanimë, duke u shndërruar në një nga golashënuesit e këtij kampionati. Por Shqipëria rrezikon të humbasë këtë talent të futbollit, nëse nuk veprohet shpejt, pasi Sllovenia po përgatitet t’i ofrojë nënshtetësinë dhe fanellën e përfaqësueses.
Françesko Tahiraj, vlonjati që ka dalë nga shkolla e futbollit të Juventusit, po shkëlqen gjithnjë e më tepër në nivelin më të lartë të kampionatit të futbollit në Slloveni. 22-vjeçari, që u zhvendos para 4 vitesh nga Torino në vendin ballkanik, ka ardhur duke e rritur çdo sezon paraqitjen e tij. Dhe në sezonin e 4-t në futbollin slloven, dhe të 3-tin me skuadrën e Aluminijit, ai ka shpërthyer tanimë, duke u shndërruar në një nga golashënuesit e këtij kampionati.
Nëse në sezonin e tij të parë, kur luante me skuadrën e Zavrçit, ai luajti 20 ndeshje, nga të cilat 14 si titullar dhe 6 si zëvendësues, shënoi dy gola, e në të dytin, të parin e tij tek Aluminij, ku luajti 25 ndeshje, nga të cilat 14 si titullar dhe 11 si zëvendësues, shënoi gjithashtu 2 gola, në dy sezonet e tjerë, futbollisti i talentuar ka njohur rritje. Në sezonin e tij të 3-të, ai luajti 29 ndeshje, nga të cilat 24 si titullar dhe 5 si zëvendësues, duke shënuar 5 gola.
Ndërsa në sezonin e 4-t, atë aktual, shqiptari ka qenë i papërmbajtshëm, duke u aktivizuar si titullar në 17 nga 18 ndeshjet që skuadra e tij ka luajtur në këto 19 javë kampionat. Ai ka shënuar 9 gola, duke qenë midis shënuesve më të mirë të kampionatit slloven. Ndonëse në Shqipëri pak është folur për të, që nga viti 2012 ku ai u aktivizua me Kombëtaren e Nën-17-vjeçarëve, që humbi minimalisht në Hungarinë dhe Italinë, ndërsa fitoi 6-0 me Luksemburgun, në Slloveni ai është vendosur në qendër të vëmendjes.
Dhe tanimë mediat e Ljubljanës raportojnë se atij po përgatitet t’i bëhet një ofertë për të veshur fanellën e përfaqësueses së atij vendi. Në fakt, në takimet e zhvilluara së fundmi nga Tahiraj, i pranishëm ka qenë edhe një nga figurat e futbollit slloven, Igor Benedijçiç, i cili ka shërbyer si trajner kujdestar i përfaqësueses sllovene në dy ndeshje gjatë 2018-ës. Duket se ai ia ka sugjeruar emrin e shqiptar pasardhësit të tij, trajnerit të rikthyer të Sllovenisë, Matjazh Kekut.
Mediat vendase kanë spekuluar se, teksa kërkohet të jesh rezident për 5 vite për të marrë nënshtetësinë, Françesko Tahiraj ka 4 vite që jeton dhe luan në Slloveni. Kësisoj, edhe me një procedurë të përshpejtuar, atij mund t’i ofrohet nënshtetësia sllovene dhe, bashkë me të, edhe vendi në përfaqësuese. Kjo do të ishte padyshim një humbje për Shqipërinë, e cila kohët e fundit është përballur me një mungesë lojtarësh që shënojnë gol në Kombëtare.
E për më tepër, Françesko Tahiraj është vetëm 22 vjeç dhe shumë më tepër pritet prej tij, teksa, duke iu referuar medieve sllovene, është e sigurt që ai do të ndërrojë klub në merkaton e janarit, duke u zhvendosur në një skuadër më të madhe evropiane.
