ASNN – Sipas të përditshmes së njohur italiane, “Il Messaggero”, që e ka bazën në kryeqytet, trajneri i Kombëtares shqiptare, Kristian Panuçi, po piketohet si zëvendësuesi i Di Françeskos në stolin e Romës. Megjithatë, pasdite, vetë trajneri i Kombëtares kuqezi, e ka mohuar kategorikisht këtë lajm. Kombëtarja kuqezi e futbollit ka përjetuar një pështjellim gjatë të ditës së hënës pasi një lajm i bujshëm ka qarkulluar në mediat italiane.

Sipas të përditshmes së njohur italiane, “Il Messaggero”, që e ka bazën në kryeqytet, trajneri i Kombëtares shqiptare, Kristian Panuçi, po piketohet si zëvendësuesi i Di Françeskos në stolin e Romës. Madje sipas kësaj të përditshmeje, 45-vjeçari po qëndron në prapaskenë dhe pritet që në ditët e ardhshme të ketë një takimin me drejtuesit verdhekuq. “Il Messaggero” pohon se italiani ka kontratë me Shqipërinë deri në vitin 2019, por një ofertë nga Roma mund të ishte e parezistueshme për të.

Panuçi gëzon raporte të mira me Franko Baldinin, njeriun e besuar të presidentit Palota dhe nuk është çudi që t’i besohet stoli i skuadrës italiane që kohët e fundit është në krizë rezultatesh. Në vijim, gazeta italiane zbulon se Panuçi ka zgjedhur Karaibet për të kaluar festat e fundvitit, por me shumë gjasa do të largohet të enjten drejt Romës, pasi të premten do të jetë prezent në “Olimpico”  për të ndjekur nga afër takimin përballë Parmës.

Po sipas “Il Messaggero”-s, atë ditë pritet të ketë dhe një takim me drejtuesit romanistë dhe trajnerit 45-vjeçar në lidhje me të ardhmen e skuadrës. Megjithatë, pasdite, trajneri i Kombëtares, Kristian Panuçi, ka mohuar kategorikisht këtë lajm. Në një prononcim të shkurtër për mediat shqiptare, trajneri italian ka këmbëngulur se nuk ka asnjë kontakt me klubin e Serisë A, duke theksuar se ka për të respektuar kështu kontratën që ka me FSHF-në.

“Unë me klubin e Romës nuk kam absolutisht asnjë kontakt. Për më tepër kam kontratë me Federatën Shqiptare të Futbollit”, – deklaroi trajneri i Shqipërisë.