ASNN – Kukësi ka rimarrë vendin e dytë në Kategorinë Superiore, pasi mundi të dielën Kastriotin me rezultatin 2-0. Ishte një ndeshje ku verilindorët nuk e vunë në diskutim triumfin dhe njëherësh morën tri pikë që “kërcënojnë” Partizanin kryesues, tashmë vetëm 3 pikë larg. Ndeshja u vendos me dy gola, një në fillim të ndeshjes me Limajn (minuta e 2-të), si dhe një gol në fundin e pjesës së parë me Rexhinaldon (minuta e 35-të).

E parë në tërësi dukej një ndeshje e lehtë për Kukësin, por në fushë nuk rezultoi kështu, sepse skuadra e trajnerit Armando Cungu hasi në vështirësi në depërtimin e zonave mbrojtëse të ekipit krutan dhe në tërësi Kastrioti luajti mirë. Madje skuadra e trajnerit Stavri Nica tentoi të bëjë befasinë, por një Kukësi me eksperiencë dhe pretendent për titull ishte e pamundur t’i bëje “gropën”. Përfundimisht fitoi Kukësi 2-0 dhe siguroi një trepikësh që e kthen në vend të dytë.

Tashmë në kuotën e 34 pikëve, vetëm 3 pikë më pak se Partizani i vendit të parë. Pra gara për titullin kampion është më e hapur se kurrë. Edhe pse Partizani u shpall “kampion dimri”, është realisht Kukësi që ka qëndrueshmërinë dhe ecurinë më të mirë të javëve të fundit, një ecuri që e bind ekipin verilindor të jetë një favorit për trofeun kryesor të futbollit shqiptar. Ndërkaq, janë zhvilluar të premten dy ndeshjet e para të javës së 18-të të Kategorisë Superiore të Kampionatit Kombëtar të Futbollit.

Tirana rikthehet të shkëlqejë dhe të fitojë. Skuadra e drejtuar nga Ardian Mema fitoi në shtëpi 1-0 përballë Flamurtarit, duke e mbyllur vitin 2018 me fitore. Bardheblutë kanë zhvilluar një lojë bindëse përballë një Flamurtari që dukej sikur ishte futur në fushën e lojës për të marrë 1 pikë. Rastet e shumta të krijuara nga bardheblutë u kurorëzuan vetëm në minutën e 87-të pas golit të shënuar nga Edon Hasani. Një fitore që e ngjit Tiranën në kuotën e 17 pikëve.

Ndërkohë Skënderbeu vijon rënien e lirë. Skuadra e Orges Shehit, regjistroi humbjen e 4-t rradhazi duke u mundur dhe nga Kamza. Ernest Gjoka arriti kështu fitoren e parë në krye të Kamzës, falë golit të Masato Fukuit në minutën e 43-të. Java e 18-të e Kategorisë Superiore vijoi të shtunën pasdreke me takimin Teuta-Laçi që u mbyll në barazim 1-1, ashtu sikundër përfundoi të dielën edhe sfida e Gjirokastrës, midis Luftëtarit dhe Partizanit.

Kategoria Superiore

Java e 18-të

Të premten, 14 dhjetor 2018:

Kamza – Skënderbeu          1-0

Tirana – Flamurtari               1-0

Të shtunën, 15 dhjetor 2018:

Teuta – Laçi                           1-1

Të dielën, 16 dhjetor 2018:

Luftëtari – Partizani              1-1

Kukësi – Kastrioti                  2-0

Renditja

Nr.       Skuadra         N.        F.         B.        H.        Gsh-Gp          Pikë

1. Partizani        18        11        4            3        19-98              37
2. Kukësi            18        10        4            4        18-9                34
3. Teuta              18          9        6            3        24-13              33
4. Skënderbeu  18          9        3            6        20-13              30
5. Laçi                 18          8        6            4        16-13              30
6. Flamurtari      18          8        4            6        15-12              28
7. Tirana             18          4        5            9        19-21              17
8. Luftëtari         18          5        2          11        15-21              17
9. Kamza            18          4        3          11          9-20              15
10. Kastrioti 18          3        1          14        11-35              10