ASNN – Kategoria e Parë e Kampionatit Kombëtar të Futbollit luan në fundjavë ndeshjet e javës së 14-të të saj, që është edhe java e fundit për vitin 2018. Si zakonisht, Rrjeti i Radio-Televizionit Shqiptar do të sjellë dy takimet më të spikatura të grupeve përkatëse dhe të shtunën, duke nisur nga ora 13:30, vjen drejtpërdrejt përballja e Lezhës, midis Besëlidhjes dhe Erzenit të Shijakut.

Vendasit janë të 4-tët në renditje në prag të kësaj sfide, me 19 pikë, ndërsa miqtë mbajnë vendin e dytë me 27 pikë, 5 më pak sesa Vllaznia kryesuese, e cila përballet në Shkodër në derbi me Veleçikun e Koplikut. Takimet e tjera të kësaj jave në grupin e Veriut janë Dinamo-Shënkolli, Burreli-Vora dhe Korabi-Iliria e Fushë-Krujës. Ndërkaq të shtunën luhen 4 takime të javës së 14-të të grupit B, të cilat janë Besa-Oriku, Tomori-Egnatia e Rrogozhinës, Pogradeci-Turbina e Cërrikut dhe Elbasani-Bylis.

Takimi i fundit i kësaj jave në grupin e Jugut luhet të dielën dhe Lushnja pret Apoloninë në përballjen që luhet në Stadiumin “Roza Haxhiu”. Kjo ndeshje, që do të sillet për sportdashësit drejtpërdrejt nga Rrjeti i Radio-Televizionit Shqiptar, duke nisur nga ora 13:30, është një derbi myzeqar që vë përballë vendasit që mbajnë aktualisht vendin e 4-të, me 20 pikë, 7 më pak sesa Bylisi kryesues, me fierakët që janë 3 shkallë poshtë, në vendin e 7-të, me 4 pikë më pak.

Kategoria e Parë

Java e 14-të

Grupi A

Të shtunën, 22 dhjetor 2018:

Veleçiku Koplik – Vllaznia  (13:30)

Besëlidhja – Erzeni Shijak  (13:30)

Dinamo – Shënkolli             (13:30)

Burreli – Vora                                    (13:30)

Korabi – Iliria Fushë-Krujë  (13:30)

Grupi B

Të shtunën, 22 dhjetor 2018:

Besa Kavajë – Oriku                         (13:30)

Tomori – Egnatia Rrogozhinë        (13:30)

Pogradeci – Turbina Cërrik             (13:30)

Elbasani – Bylis                                (13:30)

Të dielën, 23 dhjetor 2018:

Lushnja – Apolonia                          (13:30)