ASNN – Trajneri i Frajburgut sqaron situatën e Amir Abrashit: “Mund të luajë vetëm në mars”. Mesfushori i përfaqësueses së Shqipërisë, Amir Abrashi, pësoi një dëmtim të rëndë në marsin e këtij viti dhe kur viti po mbyllet ai ende nuk është rikuperuar plotësisht për të qenë gati për skuadrën e tij të Frajburgut në kampionatin elitar gjerman, Bundesligë Shtatshkurtri shqiptar ka vuajtur mjaft nga lëndimet, duke bërë që të qëndrojë shumë kohë jashtë fushave, por kjo e rastit të fundit ishte tronditëse.
Sipas mediave gjermane, që u referohen zyrtarëve të klubit, Abrashi do të mund të kthehet në gjirin e Frajburgut vetëm në muajin mars, pasi atëherë parashikohet ta ketë kaluar plotësisht rrezikun. Ka qenë vetë trajneri i tij, Kristian Straih, i cili ka dhënë disa detaje rreth rikuperimit të futbollistit dhe formës së tij të momentit, por edhe duke sqaruar kohën kur besohet se mesfushori i Kombëtares kuqezi, me origjinë nga Kosova, do të jetë gati për të luajtur rregullisht.
“Amiri është stërvitur mirë, shumë fuqishëm, – është shprehur trajneri i Frajburgut, Straih, për faqen e njohur gjermane në Internet, “ligainsider.de”, – të gjithë që e njohin Amirin, e dinë se çfarë luftëtari është në fushë. Ai edhe stërvitet me ritëm të njëjtë. Abrashi ka jashtëzakonisht muskuj të fortë, por ai mund t’i bashkohet ekipit tonë në fund të muajit janar dhe ne do ta kemi në dispozicion për ndeshjet e muajit mars të vitit të ardhshëm.”
“Procesi i shërimit të mesfushorit tonë është duke shkuar mirë, kështu që ne duhet të jemi të lumtur me këtë proces, ka vijuar trajneri i ekipit të shtatshkurtërit. – Na ka munguar shumë dhe presim sa më shpejt ta kemi në dispozicion. Ai është i rëndësishëm për ne.” Abrashi i ka munguar mjaft edhe përfaqësueses kuqezi, pasi dihet që ai është “motori” i vërtetë i Kombëtares dhe këtë e ka treguar edhe në ndeshjet e fazës finale të Kampionatit Evropian në “Francë 2016”.
Kthimi i tij në mars përkon me nisjen e Eliminatoreve të Evropianit të vitit 2020 dhe ky është një sinjal pozitiv për kuqezinjtë në tërësi dhe trajnerin Kristian Panuçi në veçanti.
