ASNN – Nuk ka surpriza, Tirana mposht Farkën dhe kualifikohet në gjysmëfinale të Kupës së Shqipërisë. Kështu, Kupa e Shqipërisë në volejboll për meshkuj mbylli fazën e saj në grupe dhe përcaktoi 4 skuadrat që do të vazhdojnë në gjysmëfinale të saj. Nga grupi A ishin kualifikuar që në javën e kaluar Vllaznia dhe Partizani, kurse nga grupi B dilemat u shuan të hënën në mbrëmje, në ditën e 5-të të ndeshjeve të këtij grupi, ku Tirana mposhti Farka Volej dhe siguroi kalimin për në turin tjetër të Kupës, pra në gjysmëfinale, duke iu ngjitur kështu Erzenit, rivalit tjetër në grup, që siguroi 4 fitore radhazi dhe meritoi vendin e parë.
Tirana u kualifikua si vend i dytë në grup, me 9 pikë, pasi në ndeshjen e luajtur të shtunën, në një duel direkt derbi, mundi Farka Volej me rezultatin 3-1. Ishte një ndeshje derbi e denjë për emrin. Farka, e mbushur me të rinj premtues, luajti fort, rivalizoi me forcë të madhe shpirtërore dhe e dëshiroi fort kualifikimin. Por mundësitë deri këtu shkonin dhe Tirana, me përvojë, por edhe cilësinë në skuadër, ia doli që të shkojë më tej. Seti i parë u fitua ngushtë nga bardheblutë me shifrat 25-23. Por në setin e dytë, sërish me një rivalitet të theksuar dhe me pikëaverazh që anonte sa në një krah në tjetrin, u fitua nga djemtë e Farkës me shifrat 25-23.
Pas dy seteve të para loja ishte e barabartë 1-1 dhe Farka kishte ende shpresë për kualifikim. Por eksperienca e Tiranës, qëndrueshmëria dhe dinakëria në lëvizjet tekniko-taktike, sollën diferencën. Bardheblutë e rrjetës fituan setin e tretë me rezultatin 25-20 dhe pas një tensioni që krijoi ngërç në radhët e skuadrës së trajnerit Dritan bardhi, Tirana arriti ta dominojë edhe setin e katërt, të cilin e fitoi me shifrat 25-20 dhe krejt ndeshjen 3-1, duke siguruar kështu një vend në 4 më të mirat e Kupës së Shqipërisë. Farka Volej eliminohet, por paraqitjet e saj ishin vërtet të mira dhe ishte një eliminim me kokën lart.
Dueli tjetër i kësaj faze në grupin B ishte ai mes Erzenit dhe Teutës, një derbi i qarkut të Durrësit, ku fituan shijakasit me rezultatin e thellë 3-0. Në këtë takim nuk pati kurrfarë emocioni, pasi diferencat në parket midis dy skuadrave ishin të mëdha. Dy setet e para i fitoi Erzeni me shifrat e njëjta 25-14, kurse në setin e 3-të, durrsakët bënë një farë rezistence që i dhanë paksa dinamizëm duelit. Megjithatë, Erzeni fitoi 25-19 dhe krejt ndeshjen 3-0, fitorja e katërt rresht në këtë grup dhe vendi i parë në mënyrë të merituar me 12 pikë. Studenti e kishte pushim në këtë ditë të 5-të, por ai nuk përfiton, pasi ishte eliminuar që më parë.
Si përfundim, në gjysmëfinale kualifikohen Partizani, Vllaznia, Erzeni dhe Tirana, të cilat do të synojnë të bëjnë të tyre trofeun e Kupës së Shqipërisë.
Kupa e Shqipërisë
Volejboll – Meshkuj
Grupi B
Dita e parë, 7 dhjetor 2018:
Tirana – Teuta 3-0
(25-10, 25-10, 25-12)
Studenti – Farka Volej 1-3
(25-13, 17-25, 19-25, 25-27)
Erzeni (pushim)
Dita e dytë, 8 dhjetor 2018:
Teuta – Studenti 0-3
(18-25, 15-25, 11-25)
Erzeni – Tirana 3-1
(25-22, 26-24, 25-27, 25-21)
Farka Volej (pushim)
Dita e 3-të, 9 dhjetor 2018:
Studenti – Erzeni 0-3
(19-25, 12-25, 23-25)
Farka Volej – Teuta 3-0
(25-17, 25-20, 25-16)
Tirana (pushim)
Dita e 4-t, 16 dhjetor 2018:
Erzeni – Farka Volej 3-0
(25-18, 25-14, 25-13)
Tirana – Studenti 3-0
(25-16, 25-21, 25-21)
Teuta (pushim)
Dita e 5-të, 17 dhjetor 2018:
Teuta – Erzeni 0-3
(14-25, 14-25, 19-25)
Farka Volej – Tirana 1-3
(23-25, 25-23, 20-25, 20-25)
Studenti (pushim)
Renditja
Nr. Skuadra N F H Setet Pikë
- Erzeni 4 4 0 12-1 12
- Tirana 4 3 1 10-4 9
- Farka Volej 3 2 2 6-7 6
- Studenti 4 1 3 4-9 3
- Teuta 4 0 4 0-12 0
