ASNN – Lojtarët e rinj të Kombëtares regjistruan një paraqitjetë mirë në fundjavën që lamë pas, madje pati prej tyre që lanë gjurmë në fiushë, duke shënuar edhe gola sikurse ndodhi me Manajn, Durmishajn e ndonjë tjetër, por edhe loja plot pasion e Vrionit, Latifit e Qakës, që shkëlqyen me pasime ideale për shokët në fitoren e skuadrave të tyre. Një paraqitje mjaft të mirë bëri dhe Eros Grezda në kampionatin skocez, ku dha pasimin ideal për golin e fitores së Gllasgou Rejnxhërsit.
Grezda bëri një ndeshje të plotë 90-minutëshe dhe në javët e fundit ka qenë titullar i padiskutuar, diçka mjaft pozitive dhe për vazhdimësinë në Kombëtare. Minutazh të plotë në fundjavën që lamë pas pati edhe mbrojtësit Katriot Dermaku me Kozencën, si dhe Herdi Prenga në kampionatin kroat, që pavarësisht se humbi me ekipin e tij, pati një paraqitje pozitive kundër Osijekut. 90 minuta luajti dhe Ergys Kaçe me Panathinaikosin, madje dha një super-pasim për golin në fitoren 1-0 ndaj Atromitosit.
Paraqitjet e fundit të mesfushorit fantazist të kuqezinjve kanë qenë fantastike. Taulant Seferi, futbollisti shqiptar nga Maqedonia që ka zgjedhur të luajë për Shqipërinë, ka bërë një paraqitje fantastike në Zvicër, ku luajti 86 minuta dhe pati peshë në fitoren e skuadrës së tij. Kristal Abazaj gjeti për herë të parë minutat me ekipin e parë të Anderlehtit. Ishin 21 minuta plot shporesë për ish-sulmuesin e Luftëtarit, i cili nuk e shmangu dot humbjen e skuadrës së tij.
Paraqitje të mira edhe për Rei Manaj, i cili shënoi në fitoren e Albasetes në ligën e dytë spanjolle, por edhe për Xhakomo Vrionin që po merr vëmendje të madhe në Serinë B italiane me Venecian. I vetmi lojtar që ka humbur shkëlqimin është Elseid Hysaj. Mbrojtësi shkodran qëndroi 90 minuta në stol në ndeshjen që Napoli fitoi në udhëtim ndaj Kaljarit me rezultatin 1-0. Për mbrojtësin kuqezi po vijnë ditë të vështira, pasi në skemat taktike të trajnerit Karlo Ançeloti nuk ka vend për të.
Prandaj, largimi nga Napoli në merkaton e dimrit mund të jetë alternative e vetme për Hysajn.
