ASNN – Gjysma e parë e Superligës së Basketbollit për Meshkuj u mbyll të shtunën me ndeshjet e javës së 10-të, që ishte edhe e fundit e fazës së dytë. U luajtën 3 ndeshje por nuk pati kurrfarë ndryshimi në renditje, sepse të tri skuadrat e kreut arritën fitore dhe ruajtën pozitat e tyre. Me fitoren e thellë 117-90 që arriti ndaj Kamza Basketit, Goga Basket ruajti vendin e parë dhe ia doli të shpallet “kampione dimri”.

Ishte një ndeshje e mirë për Gogën, e cila ruajti distancën e duhur pas çdo pjese të lojës dhe në fund duke fituar me 27 pikë diferencë. Nga kjo ndeshje mund të veçohet një detaj, që ka të bëjë me sulmin. Goga Basket ka sulmin më të mirë në kampionat, dëshmuar me pikëaverazhin më të mirë se rivalët dhe nuk është rastësi që ndodhet në vend të parë.

Skuadra tjetër nga Durrësi, Teuta, arriti një fitore të lehtë sot në kryeqytet përballë Tiranës, të cilën e mundi me shifrat 98-69. Janë 29 pikë diferencë që tregojnë qartë dominimin e “Djemve të detit” dhe njëherësh pretendimet e kësaj skuadre për titull. Tirana nuk tregoi asgjë nga vlerat e saj në këtë ndeshje dhe me humbjen që pësoi të shtunën mbetet në vendin e katërt me 14 pikë.

Një më shumë se Kamza Basket që ndodhet një pozicion më poshtë. Në këtë ndeshje Tirana rezistoi vetëm në 10-minutëshin e parë, ndërsa diferenca e madhe erdhi në dy pjesët e fundit, ku skuadra nga Durrësi vendosi diktatin e saj përfundimtar me një fitore të thellë. Ndeshja e tretë dhe jo më pak e rëndësishme ishte ajo mes Partizanit dhe Vllaznisë, e luajtur në Pallatin e Sportit “Asllan Rusi” në kryeqytet.

Fitoi Partizani me rezultatin e ngushtë 82-75. Në të vërtetë shkodranët kishin ardhur me pretendime të mëdha për ta fituar ndeshjen dhe rivalizuan deri në fund. Lojtarët e rinj që kanë sjellë në ekip ende nuk janë harmonizuar si duhet, ndërsa Partizani i trajnerit Arben Fagu diti të shfrytëzojë lojën kreative, saktësinë në goditje dhe njëherësh mbrojtjen efikase, duke e dominuar mbi të gjitha ndeshjen në planin psikologjik.

Për rrjedhojë, pas kësaj humbjeje Vllaznia mbetet në vend të fundit, kurse Partizani ruan vendin e dytë.

Kampionati Kombëtar

i Basketbollit – Meshkuj

Superliga

Java e 10-të

Të shtunën, 15 dhjetor 2018:

Goga Basket – Kamza Basket        117-90

Partizani – Vllaznia                             82-75

Tirana – Teuta                                      69-98

Renditja

Nr.       Skuadra                     N.        F.         H.        Psh-Pp           +/-                    Pikë

1. Goga Basket             10        8          2          938-796         142                 18
2. Partizani                    10        7          3          821-730           91                  17
3. Teuta                          10        7          3          901-694         207                 17
4. Tirana                         10        4          6          783-853         -70                 14
5. Kamza                        10        3          7          761-919         -158                13
6. Vllaznia                     10        1          9          706-918         -212                11