ASNN – Majlinda Kelmendi mesazh video: 14 muaj jashtë xhudos nuk funksionoi asgjë, në Kosovë çdo medalje veç të artës quhet dështim. Sportistja e spikatur e xhudos së Kosovës dhe asaj botërore në peshën deri në 52 kg, medalistja olimpike Majlinda Kelmendi, një xhevahir i sportit të Kosovës dhe atij shqiptar në tërësi, është kthyer tashmë plotësisht si konkurruese e fortë në garat ndërkombëtare.
Dhe kjo, pas një periudhe 14-mujore e tërhequr si pasojë e një dëmtimi të rëndë e të gjatë që e la për shumë kohë jashtë tapetit. Kelmendi ka dhënë një video-mesazh të publikuar në faqen zyrtare të Federatës Botërore të Xhudos, ku përshkruan ata muaj me të vërtetë të vështirë, ku çdo lloj aktiviteti tjetër social nuk ia hiqte dot stresin, ndërsa shprehet se në Kosovë presin prej saj vetëm medalje ari.
Kelmendi u kthye me bujë dhe fitore të rëndësishme në fund të muajit tetor, duke marrë të argjendtën në “Grend Slem”-in e Abu Dhabit, ndërsa pak ditë më pas fitoi të artën në “Çmimin e Madh” të Tashkentit. “I dua aq shumë luftën dhe ushtrimet dhe përpiqesha të bëja gjëra tjera për të harruar, por nuk funksionoi shumë”, – shprehet në video-mesazh kampionia olimpike e Kosovës.
“As udhëtimet nuk ndihmuan shumë, – vijoi ajo. – As shopingu s’funksionoi. Asgjë nuk funksiononte.” Më pas ajo komentoi pritshmëritë e mëdha, si dhe qëndrimin e sportdashësve në Kosovë, ku dëshirojnë vetëm medalje ari prej saj. “Ajo që nuk më pëlqen është se kur marr të argjendtën apo të bronztën, askush nuk më uron”, – rrëfeu ajo.
“Është xhudo, nganjëherë fiton apo humb, por kur nuk fitoj të artën askush nuk më uron. Njerëzit janë mësuar të fitoj të artën andaj kjo më vë paksa nën presion”, përfundoi Majlinda Kelmendi, më e forta në gjirin e një grupi të talentuar xhudistësh në Kosovë, që drejtohen nga trajneri pasionant, Driton Kuka.
