ASNN – Laçi zhgënjen, barazon me Kamzën dhe humb shansin të sfidojë kryesuesit, Kategoria Superiore bëhet “rebus” në krye dhe në fundin e saj. Kamza ia doli dhe këtë herë të marrë pikë. E bëri përballë Laçit, në një ndeshje mjaft të vështirë, për më tepër, në fushën e kurbinasve. Dueli midis këtyre dy skuadrave i luajtur sot në kuadër të javës së 15-të të Superiores, përfundoi në barazim 0-0.

Mund të quhet sukses i Kamzës dhe zhgënjim i Lacit, pasi kurbinasit zbresin tashmë në vend të 5-të me 26 pikë, duke mbetur 8 pikë larg Partizanit kryesues. Natyrisht, formula e garës u lejon skuadrave të shpresojnë deri në fund, sepse ka shumë duele direkte, por për Laçin kjo ishte një përballje zhgënjyese, sepse synohej trepikëshi. Skuadra e trajnerit Migen Memelli ka marrë prej vitesh nofkën “mace e zezë” në Superiore.

Kjo për shkak të pengesave që u bën skuadrave pretendente si Skënderbeu, Partizani e të tjera, por sot “macja e zezë” rezultoi të ishte Kamza, që doli me një pikë nga fusha e vështirë e Kurbinit. Me këtë pikë të marrë sot Kamza shkon në 9 pikë dhe pavarësisht se zbret në fund të fundit, pasi Kastrioti mori 3 pikë dhe e parakaloi, duhet thënë se ishte rezultat pozitiv i marrë përballë një rivali shumë të fortë.

Pas mbylljes së javës së 15-të, mund të thuhet se skuadrat e fituara janë Partizani që fitoi derbin me Tiranën dhe shkëputet në kryesim me 34 pikë, Teuta, që u rifut në garën e kryesuesve për titull pas fitores së papritur në Korçë ndaj Skënderbeut, Kukësi që mori tri pikë vendimtare në Gjirokastër ndaj Luftëtarit, si dhe fitorja entuziazmuese e Kastriotit ndaj Flamurtarit.

Nga kjo javë rezultoi, gjithashtu, një ndërlikim i renditjes si në grupin e kryesuesve, ashtu dhe në atë të mbijetesës, pasi nuk ka asnjë skuadër që mund të cilësohet favorite për titull, por njëherësh gara e mbijetesës në fundtabelë, me 4 ekipe që rrezikojnë, është bërë një “rebus” i vërtetë. E parë në këtë prizëm, kjo javë dëshmoi se gara mori një frymë rivaliteti të spikatur dhe kampionati bëhet interesant në tërësinë e tij.

Kategoria Superiore

Java e 15-të

Të premten, 30 nëntor 2018:

Partizani – Tirana                 2-1

Të shtunën, 1 dhjetor 2018:

Luftëtari – Kukësi                  0-1

Skënderbeu – Teuta                        0-1

Të dielën, 2 dhjetor 2018:

Laçi – Kamza                         0-0

Kastrioti – Flamurtari            1-0

Renditja

Nr. Skuadra               Pikë

1. Partizani 34
2. Skënderbeu 30
3. Teuta 28
4. Kukësi 27
5. Laçi 25
6. Flamurtari 22
7. Luftëtari 13
8. Tirana 11
9. Kastrioti 10
10. Kamza 9