ASNN – Supozohej të ishte një ndeshje ku do të ndahej “shapi nga sheqeri”, por nuk ka rezultuar kështu, sepse ka lënë gjithçka të hapur sa u përket dy ekipeve gjysmëfinaliste në Grupin A pas takimeve të ditës së dytë të eliminatoreve të Kupës së Shqipërisë në volejboll për femra. Mirdita fitoi me vështirësi të shtunën në mbrëmje, 3-2 ndaj Partizanit, në ndeshjen e luajtur në Pallatin e Sportit “Ramazan Njala” të Durrësit.

Në fakt, u duk se Mirdita e rikthyer këtë sezon në nivelin më të lartë të rrjetës shqiptare të femrave dhe që e mbylli fazën e parë në krye të renditjes, do të merrte një fitore të thjeshtë dhe të pastër, pasi i fitoi pa shumë probleme dy setet e para. Por, më pas erdhi reagimi i Partizanit, kampione në fuqi, që i fiton dy setet e tjera dhe barazon shifrat në 2-2, duke bërë që gjithçka t’i drejtohet setit final.

Në këtë set është sërish ekipi rrëshenas që dominon dhe fiton 15-11 e krejt ndeshjen 3-2, duke marrë dy pikë që e ngjitin në krye të grupit, një pikë më shumë se Partizani. Por Teuta i mban ende gjallë, të paktën matematikisht, shpresat për një vend në gjysmëfinalet e Kupës së Shqipërisë, pas fitores 3-1 ndaj Lushnjës në takim e zhvilluar më herët në Durrës.

Lushnja i thotë “lamtumirë” këtij turneu, ndërsa Teuta do të tentojë nesër ndaj Mirditës surprizën, për të siguruar një vend në gjysmëfinalet e Kupës. Megjithëse një gjë e tillë duket e pamundur, matematika i lejon durrsaket të shpresojnë, ndërsa Partizani e ka më të thjeshtë, pasi ka përballë myzeqaret e eliminuara dhe e ka vetë fatin në dorë sa i përket kualifikimit.

Kupa e Shqipërisë

Volejboll – Femra

Grupi A

Dita e parë, 30 nëntor 2018:

Partizani – Teuta                   3-0

(25-19, 25-12, 25-19)

Mirdita – Lushnja                  3-0

(25-10, 25-11, 25-19)

Dita e dytë, 1 dhjetor 2018:

Lushnja – Teuta                    1-3

(12-25, 25-21, 15-25, 11-25)

Mirdita – Partizani                 3-2

(25-18, 25-17, 18-25, 17-25, 15-11)

Renditja

Nr.       Skuadra         N.        F.         H.        Pikë

1. Mirdita            2          2          0          5
2. Partizani        2          1          1          4
3. Teuta              2          1          1          3
4. Lushnja         2          0          0          0

Dita e 3-të, 2 dhjetor 2018:

Partizani – Lushnja              ora 15:00

Teuta – Mirdita                       ora 17:00