ASNN – Atletika zhvillon mbledhjen e fundvitit, Ruli: Të shikohet buxheti, ndryshe nuk zhvillojmë as gjysmën e veprimtarive. Të martën u mbaj në Tiranë mbledhja e fundvitit e Federatës Shqiptare të Atletikës, me përfaqësues si vëzhgues edhe nga Ministria e Arsimit, Sportit dhe Rinisë. Krahas analizës vjetore të atletikës shqiptare, u promovuan katër sportistë të nivelit të lartë si Luiza Gega, Izmir Smajlaj, David Nikolli dhe Franko Burraj.
Një nga diskutimet ishte dhe vendimi i ri i qverisë për statusin e sportistit të nivelit të lartë dhe përfitimet që do të kenë sportistët dhe trajnerët. Por padyshim pika kryesore e diskutimit mbeti buxheti, ku presidenti i federatës Gjergj Ruli, tha se për vitin 2018 ishte akorduar një fond prej 7 milionë lekësh, me një shtesë prej 1 milion lekësh nga sekretariati i përgjithshëm i qeverisë. Por ai tha se me një shumë të tillë nuk bëhen të plota aktivitetet vjetore të atletikës, madje as gjysma e veprimtarive.
“Ne patëm për vitin që po lëmë pas në dispozicion një fond prej 7 milionë lekësh, prej të cilave 2 milionë shkuan për pagat, – u shpreh Ruli në mbledhjen e fundvitit të FSHA-së, – Na u shtua një milion nga Sekretari i Përgjithshëm i Këshillit të Ministrave dhe në total për këtë vit ne përfituam 8 milionë lekë, që prapë janë të pamjaftueshme. Me një buxhet të tillë ne si federatë e kemi të pamundur të mbulojmë aktivitetet vjetore. Por ne kemi marrë premtimin e ministrisë së sportit që do të trajtohemi me prioritet.”
“Kemi sportistë elitarë si Luiza Gega dhe Izmir Smajlaj”, – ka shtuar ai. Pretendimet e Federatës Shqiptare të Atletikës janë që në vitin 2019 të marrë një fond “grant” më shumë se 10 milionë lekësh, ku veprimtaritë më të rëndësishme ndërkombëtare ku do të marrin pjesë sportistët tanë janë Kampionati Evropian dhe Kampionati Botëror. Ambiciet janë që të paktën Gega dhe Smajlaj të shkojnë me normë në Olimpiadën e Tokios në vitin 2020.
