ASNN – Flamurtari në basketboll për femra ka fituar me shifrat 67-62 përballë SH.B.F. Tiranës, në një ndeshje ku ka patur shumë rivalitet dhe lojë të fortë. Në takimin e zhvilluar në kuadër të javës së 7-të të nivelit më të lartë të Kampionatit Kombëtar të Basketbollit për Femra, grupin A të Kategorisë së Parë, ekipi vlonjat është treguar më i qetë gjatë gjithë lojës dhe kryesisht në 10 minutat e fundit të takimit, duke arritur që në fund të dalë fituese nga Pallati i vet i Sportit.

Ka qenë, për më tepër, një fitore përballë një rivali direkt në luftën për titullin “kampion”. Ekipi i Flamurtarit ka mbyllur 10 minutat e para në epërsi 20-17, ndërsa edhe më pas, ndeshja ka qenë e rivalizuar, me epërsinë, sado të lehtë, që ndërron duar sa tek Flamurtari, sa tek Tirana. Bardheblutë e fitojnë pjesën e dytë, 17-16, por gjysma e parë e parë e takimit mbyllet 36-34 për vlonjatet e drejtuara nga trajneri Viron Toska. Ndërkohë, edhe pas pushimit të madh, loja ka vijuar e tillë me mjaft luftë të fortë sportive.

Në pjesën e katërt, Flamurtari është më mirë i vendosur në parket dhe shkon deri në 10 pikë diferencë. Vlonjatet arrihen nga Tirana e trajneres Mirza Alibegaj, por sërish në minutat e fundit ekipi vlonjat krijon diferencë, duke mbyllur më pas të gjithë takimin në shifrat 67-62 dhe duke marrë një fitore shumë të rëndësishme përballë Tiranës. Të dyja skuadrat ndajnë vendin e 3-të dhe të 4-të, me nga 11 pikë secila, por me bardheblutë me një pikëaverazh më të favorshëm.

Interesant është fakti se në takimin e fundit të javës së 7-të, Vllaznia ka mposhtur Elbasanin me rezultatin 88-69, duke u ngjitur në vendin e dytë të renditjes. Ardhja e një dore të sprovuar si ajo e Bledar Gjeçajt, trajnerit që ka shijuar më parë sukses me meshkujt kuqeblu, ka nisur të japë frytet e veta dhe shkodranet janë bindshëm në 4-shen e më të mirave të nivelit më të lartë të koshit shqiptar të femrave, duke bërë që tanimë titulli të përvijohet përgjatë aksit Shkodër-Tiranë-Vlorë.

Kampionati Kombëtar

i Basketbollit – Femra

Kategoria e Parë

Grupi A

Java e 7-të

Të premten, 23 nëntor 2018:

Sh.K.B.F. Tirana – Studenti                        90-56

Të shtunën, 24 nëntor 2018:

Flamurtari – SH.B.F. Tirana            67-62

Vllaznia – Elbasani                          88-69

Renditja:

Nr.       Skuadra                     N.        F.         H.        Psh-Pp           +/-        Pikë

1. SH.K.B.F Tirana       7          7          0          622-461         161    14
2. Vllaznia                     7          5          2          486-473            13     12
3. SH.B.F Tirana           7          4          3          540-448            92     11
4. Flamurtari                  7          4          3          501-470            31     11
5. Studenti                     7          1          6          432-542         -110      8
6. Elbasani                    7          0          7          433-620         -187      7