ASNN – Skuadra e basketbollit të femrave, SH.K.B.F.Tirana, mundi të premten në derbi Studentin me rezultatin e thellë 90-56, në takimin që ngriti siparin e javës së 7-të. Ishte një fitore e merituar për skuadrën e trajnerit Erdal Borova, e cila në 7 ndeshje të luajtura ka siguruar po aq fitore, duke qenë e papërmbajtshme dhe me meritë në krye të renditjes në grupin A, me 14 pikë të plota.
Por fitorja me Studentin nuk ka kaluar pa pasoja, sepse dy lojtare të formacionit janë dëmtuar dhe u detyruan të lënë ndeshjen, duke i shkaktuar trajnerit Borova një stres në këtë periudhë. Korçarja Xhensila Toska ka dëmtuar gjurin dhe të hënën do t’i nënshtrohet rezonancës magnetike, pasi dyshohet për dëmtim të ligamenteve të gjurit. Ndërkaq, edhe Baraj ka dëmtuar kaviljen.
Vetë trajneri tha pas ndeshjes se e kishin vlerësuar maksimalisht takimin, pavarësisht emrit të kundërshtarit, por kapacitetet fizike të grupit nuk ishin në nivelin maksimal. Kjo edhe për shkak të lodhjes së disa basketbollisteve që ishin të angazhuara me skuadrën kombëtare. Duke folur për mediat pas ndeshjes, Borova analizoi dhe më tej ecurinë e grupit dhe rolin që do të kenë mungesat në vijim.
“Morëm fitoren e radhës, – tha trajneri bardheblu, – por skuadra nuk ishte në nivelin e vet më të mirë për shkak se katër lojtare vinin direkt në këtë ndeshje pas angazhimeve me skuadrën kombëtare. Fatkeqësisht, në këtë ndeshje me Studentin na u dëmtuan edhe dy lojtare të reja të skuadrës tonë dhe ky është një problem i madh për ne, pasi nuk kemi shumë vajza cilësore në dispozicion.”
“Sidoqoftë, ne nuk e vumë për asnjë çast në diskutim fitoren në këtë ndeshje dhe e merituam suksesin”, – shtoi Borova, i cili, në fund, ka një mendim edhe për rivalitetin midis skuadrave kryesore dhe pretendentët për titull. Natyrisht, ai është i vetëdijshëm se skuadra e tij është favorite kryesore për atë që ka treguar deri tani. “Rivale për skuadrën tonë shikoj Flamurtarin”, – tha ai.
“Kjo skuadër, edhe pse nuk e nisi mirë sezonin, ka potencë në rritje. Por rivale është dhe Tirana tjetër (SH.B.F. Tirana), të cilën, sidoqoftë, e kemi mundur deri tani”, – përfundoi trajneri i SH.K.B.F. Tirana, Erdal Borova.
