ASNN – LëBron Xhejms fenomenal, fitore për Lejkërsat dhe në panteonin e 5-shes më të mirë të koshit amerikan. LëBron Xhejms po shkruan historinë në kampionatin amerikan të basketbollit, NBA. Dje fenomeni amerikan i koshit ishte vendimtar në fitoren me vlera të Los Anxhelos Lejkërs ndaj Portlend Trejlblezërs, me rezultatin 126-117.
Ishte pikërisht “mbreti” Xhejms që realizoi 44 pikë, pra 35% të pikëve të të gjithë skuadrës, dha 10 pasime për kosh dhe zotëroi 9 topa në tabelë, duke qenë jo vetëm më i miri i ndeshjes, por njëherësh duke thyer një rekord të ri në karrierën e tij fantastike.
Me suksesin e djeshëm, ai parakaloi një tjetër legjendë të basketbollit amerikan Uilt Çembërlejn, duke mundur të futet në panteonin e pesëshes më të mirë të basketbollit amerikan, tanimë me 31,425 pikë të realizuara.
Impakti që kishte LëBron Xhejmsi në këtë ndeshje ishte vërtet i madh dhe është pikërisht për meritë të tij që Los Anxhelos Lejkërs kanë rikuperuar mjaft javët e fundit në Konferencën e Perëndimit, duke bërë që të kenë shpresë se mund të rivalizojnë me Golden Stejtin.
