ASNN – Mbrëmjen e të martës u luajtën ndeshjet e katërta të fazës së grupeve të Ligës së Kampioneve, ku vlen të theksohet se dueli më i rëndësishëm i mbrëmjes, ai në grupin B, midis Interit dhe Barcelonës që theu dhe rekordin e përfitimeve nga biletat në Itali me 5.8 milionë Euro, përfundoi në “paqe” 1-1, në një duel ku lojën dhe rastet i pati Barcelona, dukshëm superiore, por që zikaltrit ditën me zgjuarsi të mbrohen e në fund të “pickojnë” me Ikardin, i cili realizoi golin e barazimit në minutat e fundit, duke ia hequr nga duart fitoren Barcelonës që kishte shënuar më parë me Malkuitin.

Siqodoftë, ky barazim e ndihmon Barcelonën të kalojë grupin e ta shohë veten në raundin tjetër, pasi ka 10 pikë dhe një kalendar që nuk e vë në diskutim kualifikimin e saj 9edhe matematikisht). “Epopeja” e grupit B do të ndodhë midis Interit dhe Totenhemit, pasi kanë përplasje direkte midis tyre. Interi ka 7 pikë, kurse Totenhemi, i cili fitoi dje me përmbysje ndaj PSV Eindhovenit ka 4 pikë. Dueli kokë më kokë është vendimtar për anglezët, por edhe për italianët, të cilët do të gëzoheshin edhe me një pikë nga ky takim.

Kurse holandezët e PSV Eindhovenit me 1 pikë nuk kanë praktikisht asnjë shans për të shkuar më tej. Ndërkohë, në grupin A, Atletiko e Madridit siguroi një fitore të madhe ndaj Borusias së Dortmundit, duke marrë tri pikë nga fitorja 2-0 dhe të dyja skuadrat gjenden tashmë në kuotën e 9 pikëve, praktikisht të kualifikuara, pasi dy rivalët e tyre, Monako dhe Bryzhu, nuk kanë forcën për t’i rivalizuar. Ekipi i Principatës pësoi disfatë të thellë nga belgët e Klub Bruzhit, 0-4, duke dalë “jashtë loje”. Në grupin D, Porto është e kualifikuar më tej, sepse ka 10 pikë në renditje.

Mbrëmë portugezët mposhtën 4-1 Lokomotivën e Moskës, e cila mbeti në kuotën e zero pikëve. Ndeshja tjetër, dueli direkt mes Shalkes gjermane dhe Gallatasarait turk, u fitua nga gjermanët 2-0, të cilët shkojnë në tetë pikë dhe bëjnë një hap drejt kualifikimit, kurse Gallatasarai mbetet i treti me 4 pikë, por ka shanse teorike për kualifikim.

Grupi A

Renditja

Nr.       Skuadra                     Pikë

1. Borusia Dortmund   9
2. Atletiko Madrid          9
3. Bryzh                          4
4. Monako                      1

Grupi B

Renditja

Nr.       Skuadra                     Pikë

1. Barcelona                  10
2. Inter                              7
3. Totenhem                    4
4. PSV Eindhoven        1

Grupi C

Renditja

Nr.       Skuadra                     Pikë

1. Liverpuli                     6
2. Napoli                        6
3. Paris SG                    5
4. Crvena Zvezda         4

Grupi D

Renditja

Nr.       Skuadra                     Pikë

1. Porto                           10
2. Shalke 04                    8
3. Gallatasaraj                 4
4. Lokomotiva Moskë     0