ASNN – Çellsi ofron 4 milionë Euro në sezon për Hysajn, Napoli nuk jep më shumë se 2 dhe palët janë “ngrirë”. Menjëherë sapo Mauricio Sarri mori drejtimin e bluve të Londrës, kubi anglez shprehur interesim për mbrojtësin shqiptar Elseid Hysaj, duke ofruar madje një pagë prej 4 milionë Eurosh në sezon. Kjo shifër e lartë tundoi lojtarin dhe menaxherin e tij, të cilët biseduan me Napolin për mundësinë e rritjes së pagës.
Midis palëve ka pasur bisedime për këtë çështje dhe ka shprehje interesi nga të gjithë që mbrojtësi shkodran të qëndrojë me ekipin napolitan, por shqiptari, nëpërmjet menaxherit të tij kërkon të paktën 2.5 milionë Euro dhe kjo shifër të mos diskutohet dhe të mos përfshihen në të shpërblimet dhe përfitimet anësore që vijnë nga imazhi e reklamimi.
Por Napoli nuk ka dhënë shenja që do të japë më shumë se 2 milionë Euro në sezon për shqiptarin dhe duke parë situatën e tendosur, palët kanë “ngrirë” marrëdhëniet midis tyre. Nëse nuk gjendet akordi, atëherë në fund të sezonit Hysaj mund të largohet përfundimisht nga Napoli dhe padyshim që Sarri ka një vend për shqiptarin në Londër, tek blutë e Çellsit.
Praktikisht, Hysaj ka pasur një rrogë afro 1.9 milionë euro në sezon, një rrogë që ka ardhur vazhdimisht në rritje, por duke qenë një titullar prej shumë vitesh, ai mendon se është momenti që Napoli të reflektojë rreth pagës së tij, në të kundërt oferta e Çellsit prej 4 milionë Eurosh në sezon duket jo vetëm tunduese, por e pakundërshtueshme.
