ASNN – Sportet individuale janë një shans i mirë për sportistët e vendeve të vogla si Shqipëria për të marrë medalje ndërkombëtare, përkundër sporteve ekipore, ku konkurrenca është më e madhe dhe të tilla janë edhe artet marciale, apo thënë shqiptare, artet luftarake.
Kështu, sportisti shqiptar i taekuondosë, Elord Gjana, ka marrë pjesë në Turneun e Hapur të Serbisë “Open-G1”. Ky turen konsiderohet me nivelin më të lartë të rangut “G”, ku sportistët kanë mundësi të grumbullojnë pikë olimpike. Sportisti shqiptar, Elord Gjana, arriti të renditet në vendin e tretë, duke fituar dy ndeshje.
Ndeshjen e parë e pati ndaj një kundërshtari nga Polonia, të cilin e mundi me rezultatin 22-10. Ndeshja e dytë ishte ndaj një tjetër rivali pretendent, pikërisht kundër një gjermani. Edhe këtë takim, Elord Gjana, e fitoi me rezultatin 29-20. Në përballjen e tretë, Gjana, pati si kundërshtar një sportist nga Senegali.
Ndaj tij arriti të ishte në barazim në 3 raunde, duke kaluar në raundin shtesë. Pikërisht në raundin e 4-t të përballjes, Gjana humb ndaj senegalezit me 2 pikë diferencë. Më herët ndaj këtij rivali, Elord Gjana, kishte fituar një vit më parë në Kampionatin Botëror të Taekuondosë.
Në përfundim të këtij kampionati, Elord Gjana, arriti të renditej në vendin e tretë në peshën e -54kg, duke grumbulluar në total dhe 20 pikë olimpike. Pas një jave, sportisti i ekipit “ORTEK”, do të ndeshet sërish në një kampionat të nivelit “G”, ku shpreson të fitojë medaljen e artë.
