ASNN – Kukësi fiton derbin e Veriut me Laçin, Vasil Shkurtaj i jep tri pikë Luftëtarit përballë Kastriotit. Sot u luajtën dy ndeshje nga java e 10-të të Kategorisë Superiore të Kampionatit Kombëtar, ku Kukësi mori një 3-epikësh me mjaft vlerë në një duel direkt me Laçin, në atë që quhet edhe si derbi i Veriut. Ishte braziliani Uilliam Kordeiro që shënoi për verilindorët duke i dhënë skuadrës së Armando Cungut 3 pikë mjaft të vyera për renditjen dhe vazhdimësinë.

Ky trepikësh e ngjit Kukësin në kuotën e 19 pikëve, në vend të tretë, shumë afër kryesuesve Partizani e Skënderbeu. Në tërësi ndeshja e luajtur në “Elbasan Arena” ishte e fortë, ku ekipet lanë pak hapësira për kundërshtarët. Madje Laçi ishte më mirë në këtë takim, sidomos në pjesën e parë, por fati nuk ishte me kurbinasit që iu afruan ndjeshëm golit.

Në pjesën e dytë, në minutën e 60-të Uilliam shënoi golin e fitores dhe kjo e nderoi Kukësin. Edhe pse Laçi u përpoq deri në fund të barazonte  nuk ia doli, për pasojë mbetet në vend të katërt me 16 pikë. Ndeshja tjetër e luajtur sot ishte derbi i fundtabelës, ku Kastrioti priti Luftëtarin. Ishte vërtet një takim interesant, sepse përplaseshin dy ekipet e fundit të renditjes dhe që të dyja që vinin nga humbje të shumta.

Fitoi Luftëtari me shifrat 2-0, në një ndeshje ku për cilësinë e lojës që shfaqën skuadrat në fushë duhet të fitonin krutanët. Heroi i takimit ishte Vasil Shkurtaj, i cili realizoi të dy golat e fitores për gjirokastritët në pjesën e dytë. Kështu, pjesa e parë u mbyll në barazim 0-0, megjithëse Kastrioti krijoi raste të shumta shënimi. Në pjesën e dytë Shkurtaj zhbllokoi shifrat me golin e tij në minutën e 48-të.

Kurse në minutën e 83-të, aui shënoi golin e dytë dhe vulosi fitoren e Luftëtarit, duke spikatur kështu dhe si golashënues. Me këtë fitore Luftëtari ngjitet në kuotën e 9 pikëve, po kaq sa Tirana e vendit të 7-të. Kujtojmë që kryedueli i kësaj jave do të luhet të hënën në mbrëmje në stadiumin “Selman Stërmasi” në kryeqytet midis Partizanit dhe Skënderbeut, duke nisur nga ora 19:00.

Kampionati Kombëtar i Futbollit

Kategoria Superiore

Java e 10-të

Të shtunën:

Kamza – Tirana                     1-1

Flamurtari – Teuta                1-1

Të dielën:

Kastrioti – Luftëtari    0-2

Laçi – Kukësi             0-1

Të hënën:

Partizani – Skënderbeu       (19:00)

Renditja:

1. Partizani        22
2. Skënderbeu 20
3. Kukësi            19
4. Laçi                 16
5. Flamurtari      15
6. Teuta             15
7. Tirana               9
8. Luftëtari           9
9. Kamza              8
10. Kastrioti   8