ASNN – Në atë që ishte padyshim sfida kryesore të javës së 4-t të nivelit më të lartë të Kampionatit Kombëtar të Basketbollit për meshkuj, Goga Basket ka mundur 102-89 Partizanin, duke i shkaktuar kështu skuadrës kryeqytetase humbjen e saj të parë në kampionat. Për pasojë, tri skuadra në kuotën 7 pikëve ndajnë kreun e renditjes pas ndeshjeve të luajtura sot, ku spikat edhe fitorja e Tiranës ndaj Vllaznisë.
Partizani rezistoi vetëm një pjesë loje në ndeshjen ndaj Goga Basket, në takimin e zhvilluar në Arenën Sportive “Dhimitraq Goga”, pasi më tej në fushë loja foli për ekipin durrsak, që nisi të shkëputej dhe e meritoi fitoren. Në pjesën e tretë, ekipi i Goga Basket krijon epërsi, duke përfituar edhe nga një çoroditje në fushë e Partizanit, që nisi të gabojë dhe të humbasë terren.
Epërsia prej 20 pikësh që u krijua u administrua me kujdes nga vendasit, që rikthehen te suksesi në kampionat pas humbjes në derbi një javë më parë përballë Teutës. Ndërkaq, pak më vonë, në sallën sportive “Farie Hoti” në kryeqytet, Tirana regjistroi një fitore të rëndësishme në Superligën e Basketbollit për Meshkuj, duke mundur Vllazninë me rezultatin 113-79.
Ishte një ndeshje që u dominua dukshëm nga kryeqytetasit, të cilët nga pjesa në pjesë vetëm thellonin diferencën me rivalët nga Shkodra. E ndërsa Vllaznia mbetet në vend të fundit, me rrezikun e rënies nga kategoria (edhe pse është herët për ta thënë këtë), Tiranën kjo fitore e sotme e ngjit në vend të katërt, duke i hapur rrugën rivalitetit me kryesuesit.
Kujtojmë se të premten, ndeshja e parë e javës së katërt ishte ajo e luajtur në Bathore midis Kamza Basket dhe Teutës dhe e fituar nga durrsakët 115-78.
Kampionati Kombëtar
i Basketbollit – Meshkuj
Superliga
Java e 4-t
Të premten:
Kamza Basket – Teuta 78-115
Të shtunën:
Goga Basket – Partizani 102-89
Tirana – Vllaznia 113-79
Renditja:
Nr. Skuadra N. F. H. Psh-Pp Pikë
- Teuta 4 3 1 369-269 7
- Goga Basket 4 3 1 371-316 7
- Partizani 4 3 1 329-275 7
- Tirana 4 2 2 317-330 6
- Kamza 4 1 3 285-362 5
- Vllaznia 4 0 4 257-376 4
