ASNN – Liga e Kampioneve luajti mbrëmjen e së martës ndeshjet e javës së tretë në grupet E, F, G dhe H, ku padyshim spikati fitorja e Juventusit në “Olld Traford” ndaj Mançester Junajtid, me rezultatin 1-0, në kuadër të grupit H. Ishte një ndeshje shumë e mirë dhe fitore e merituar për juventinët, të cilët sidomos në pjesën e parë krijuan shumë raste shënimi dhe e dominuan takimin në çdo aspekt. Golin e fitores e realizoi Paolo Dibala në minutën e 17-të.

Në këtë ndeshje u aktivizua edhe Ronaldo, i cili bëri një paraqitje të mirë dhe pavarësisht se u kthye në këtë stadium pas 9 vjetësh, ai tërhoqi mjaft vëmendje nga publiku anglez. Ndërkohë, në grupin H, Valencia nuk shkoi më shumë se një barazim 1-1 në Zvicër ndaj Jang Bojs, duke mbetur në kuotën e 2 pikëve, kurse Mançester Junajtid në kuotën e 4 pikëve. Pas fitores së tretë radhazi në këtë grup, Juventusi shkon në 9 pikë dhe është praktikisht i kualifikuar.

Në ndeshjet e tjera të mbrëmjes së të martës, spikatën fitoret e skuadrave kryesore evropiane, ku Reali i Madridit, pas 4 humbjesh radhazi, më në fund gjen fitoren, duke mundur në grupin G pa kurrfarë shkëlqimi, 2-1, Viktorian e Plzenjit, në një takim në Madrid ku tifozët fërshëllyen gjatë gjithë kohës skuadrën e tyre. Fitore të rëndësishme, 0-2, mori dhe Bajerni i Mynihut në Athinë përballë AEK-ut, por edhe Ajaksi ndaj Benfikës, 1-0.

Fitore këto që i ngjisin gjermanët dhe holandezët në krye të grupit E me nga 7 pikë. Po ashtu, fitore me peshë të madhe korri edhe Mançester Siti në Ukrainë, ku mundi Shahtjorin e Donjeckut në grupin F me shifrat 3-0, duke shkuar në kuotën e 6 pikëve dhe në krye të grupit. Ndeshja tjetër e grupit F, ajo mes Hofenhaimit dhe Lionit u mbyll në barazim 3-3, ku francezët ngjiten në vend të dytë me 5 pikë, duke lënë prapa Hofenhaimin dhe Shakhtarin me 2 pikë secili.

Liga e Kampioneve

2018-2019

Faza e ndeshjeve më grupe

Grupi E

AEK Athinë – Bajern Mynih                        0-2

Ajaks – Benfika                                1-0

Renditja

1. Bajern 7
2. Ajaks 7
3. Benfika 3
4. AEK Athinë 0

Grupi F

Shahtjor Donjeck – Mançester Siti                        0-3

Hofenhaim – Lion                                         3-3

Renditja

1. Mançester Siti 6
2. Lion 5
3. Hofenhaim 2
4. Shahtjor Donjeck 2

Grupi G

Real Madrid – Viktoria Plzenj         2-1

Roma – CSKA Moskë                      3-0

Renditja

1. Real Madrid 6
2. Roma 6
3. CSKA Moskë 4
4. Viktoria Plzenj 1

Grupi H

Jang Bojs – Valencia                       1-1

Mançester Junajtid – Juventus      0-1

Renditja

1. Juventus 9
2. Mançester Junajtid 4
3. Valencia 2
4. Jang Bojs 1