ASNN – 6 fitore në 6 javët e para të këtij sezoni, por trajneri Hasan Lika kërkon më shumë nga Vllaznia e tij. “Në pamje të parë ashtu duket, sikur gjithçka është e përsosur, por fakti është që ne kemi vuajtur për të shënuar dhe për të marrë fitoren dhe kjo nuk më pëlqen”, – tha ai

Lika ka guxuar duke hedhur në fushë edhe blerjen më të re të shkodranëve, Eziamaka Kolins Ikena. “Ai ka 5 ditë që stërvitet me ne, dhe duke parë ecurinë e ndeshjes, vendosëm t’i japim 20 minuta në këtë ndeshje, – tha trajneri kuqeblu. – Dhe nigeriani bëri mirë, madje mund edhe të kishte shënuar golin e dytë, apo golin e qetësisë.”

Kryeqytetasi i stolit shkodran e ka vlerësuar sidoqoftë fitoren e arritur në Fushën Sportive “Reshit Rusi” ndaj Erzenit. Supremacië e shkodranëve e ka pranuar edhe homologu i tij, trajneri i ekipit shijakas, Gentian Stojku. Takimi i radhës për Vllazninë është vizita që do t’i bëjë në fundjavë Shënkollit.