ASNN – Partizani dhe Skënderbeu nuk i lëshojnë pozitat e para në renditjen e Kategorisë Superiore, pasi fituan respektivisht ndaj Luftëtarit dhe Kamzës në kuadër të javës së 9-të, që ishte edhe java e fundit e fazës së parë të këtij sezoni. Dhe pas gjithë këtyre viteve që ka dominuar bindshëm Skënderbeu, janë të kuqtë e Partizanit në kryesim dhe pretendentë kryesorë për titullin. “Demat” mundën 2-1 në kryeqytet skuadrën e Luftëtarit. Ishte një fitore pa shkëlqim, me një stadium gati të boshatisur, pa shumë emocione dhe aspak spektakël.

Sidoqoftë, në futboll është i rëndësishëm rezultati dhe rezultati ishte në favor të Partizanit që fitoi ndaj gjirokastritëve. I pari shënoi Mensah, në një aksion ku miqtë pretenduan se ndaj portierit të tyre pati faull nga Bardhi, kurse në fund të pjesës së parë, Vasil Shkurtaj barazoi shifrat 1-1 pas një kundërsulmi të shpejtë. Në pjesën e dytë ishte një 11-metërsh i shndërruar në gol nga Bruno Telushi që fiksoi rezultatin përfundimtar 2-1 në favor të të kuqve, të cilët morën një 3-pikësh që i mban në krye të renditjes me 22 pikë, dy më shumë se sa Skënderbeu i vendit të dytë.

Ky i fundit mori sot në Korçë një fitore me vlerë kundër Kamzës, por vuajti shumë, sepse miqtë luajtën fort. Fitoi ekipi i trajnerit Orges Shehi 2-0 përballë skuadrës që drejtohet nga trajneri tjetër i ri, Klodian Duro. Për korçarët shënoi i pari Oto Xhoni në minutën e 12-të. Kamza mund të rrezikonte gjatë gjithë lojës për golin e barazimit, por ankthi për korçarët mori fund vetëm në minutën e 94-t, kur Dejvi Bregu shënoi golin e dytë e të fitores 3-pikëshe për Skënderbeun. Java e 9-të e Superiores do të mbyllet të hënën pasdite me kryendeshjen e Vlorës midis Flamurtarit e Tiranës.

Atje ku interes ka dhe në stolat përkatës, pasi Ilir Dasja do të ketë përballë ish-ndihmësin e tij deri dje te skuadra vlonjate e më parë te Skënderbeu, Ardian Memën.

Kampionati Kombëtar

i Futbollit 2018-2019

Kategoria Superiore

Java e 10-të:

Të shtunën:

Kastrioti – Kukësi                  1-2

Laçi – Teuta                           0-3

Të dielën:

Skënderbeu – Kamza          2-0

Partizani – Luftëtari              2-1

Të hënën:

Flamurtari – Tirana               (18:00)

Renditja

Nr.       Skuadra         Pikë

1. Partizani        22
2. Skënderbeu  20
3. Kukësi            16
4. Laçi                 16
5. Teuta              14
6. Flamurtari      11
7. Tirana               8
8. Kamza              7
9. Luftëtari           6
10. Kastrioti   4