ASNN – Rrjeti i Radio-Televizionit Shqiptar ka sjellë për sportdashësit të shtunën takimin më të spikatur të nivelit të dytë të Kampionatit Kombëtar të Futbollit, Kategorisë së Parë, të vlefshëm për grupin B, apo grupin e Jugut. Kjo ndeshje u luajt në Stadiumin “Roza Haxhiu” të Lushnjës dhe është Bylisi që rrezikon i pari, pas vetëm dy minutash lojë, kur ka një mundësi mjaft e mirë për të shënuar, por Dosèja tregohet i pasaktë. Tetë minuta më pas, është i njëjti lojtar që ka një tjetër rast të mirë për vendasit.

I gjendur brenda zonës lushnjare, ai godet, por gardiani vendas, Bejte, bën mrekullinë dhe shpëton portën e tij. Lushnja do të kundërpërgjigjet në minutën e 24-t, kur Çela do të provojë dy herë brenda zonës, por portieri mik, Bytyçi, është në lartësinë e duhur dhe i mohon futbollistit vendas golin. Përtej përpjekjeve të të dyja skuadrave pjesa e parë do të mbyllet me rrjeta të paprekura, ndërsa në të dytën, Dosèja gjendet brenda zonës lushnjare dhe godet në minutën e 52-të.

Por gardiani vendas, Bejte, bën sërish mrekullinë dhe shpëton portën e tij nga një gol i sigurt. Loja do të vijojë e barabartë deri në minutën e fundit, kur Bylisi do të gjejë edhe golin e epërsisë. Dosèja nuk do të gabojë në mundësinë e 4-t që do t’i paraqitet në këtë takim. Goli do të provokojë zemërimin e tifozerisë vendase, që do të shoqërohet me përplasje edhe në fushë.

Dhe gjyqtari do të nxjerrë nga loja me karton të kuq një lojtar të Lushnjës dhe dy të Bylisit. Gjyla do të rrezikojë seriozisht në minutat shtesë, por Bylisi reziston dhe fiton 1-0, duke marrë 3 pikë mjaft të vyera në Lushnjë. Në takimet e tjera të grupit B, u regjistruar rezultatet Pogradeci-Apolonia 1-0, Tomori-Turbina Cërrik 2-1, Oriku-Egnatia Rrogozhinë 2-0 dhe Besa-Elbasani 1-0.

Ndërkaq, Grupi A, apo grupi i Veriut luajti të shtunën 4 nga takimet e tij, që dhanë këto rezultate Dinamo-Vora 2-0, Besëlidhja-Shënkolli 3-1, Vllaznia-Erzeni Shijak 1-0 dhe Burreli-Iliria e Fushë-Krujës 1-4. Takimi i fundit, ai midis Veleçikut të Koplikut dhe Korabit të Peshkopisë, luhet të dielën, duke nisur nga ora 14:00.

Kategoria e Parë

Java e 3-të

Grupi A

Të shtunën, 20 tetor 2018:

Dinamo – Vora                                  2-0

Besëlidhja – Shënkolli                     3-1

Vllaznia – Erzeni Shijak                  1-0

Burreli – Iliria Fushë-Krujë              1-4

Të dielën, 21 tetor 2018:

Veleçiku Koplik – Korabi Peshkopi           (14:00)

Grupi B

Të shtunën, 20 tetor 2018:

Pogradeci – Apolonia                      1-0

Tomori – Turbina Cërrik                   2-1

Oriku – Egnatia Rrogozhinë           2-0

Besa – Elbasani                                1-0

Lushnja – Bylis                                 0-1