ASNN – Java e nëntë e Kategorisë Superiore nisi të shtunën me dy takime, Laçi-Teuta dhe Kastrioti-Kukësi, të cilat dhuruan rezultate të tilla që nxorën fitues ekipet që luanin në fushë të huaj. Me rëndësi është të analizohet ndeshja e luajtur në Stadiumin “Elbasan Arena”, ku Laçi, në mungesë të stadiumit të vet, organizonte si pritës në stadiumin e Kombëtares duelin me Teutën.

Kjo ndeshje mori një rrjedhë krejt të papritur në minutën e 3-të të saj, pasi E. Xhixha doli me karton të kuq, duke e lënë skuadrën kurbinase me 10 vetë në fushë. Kjo epërsi numerike bëri punën e vet në favor të Teutës, por duhet thënë se edhe vetë gabimet e Laçit i kushtuan skuadrës së trajnerit Artan Merxhushi, e cila u mposht 0-3 nga Teuta e homologut Bledi Shkëmbit.

Ishte disfata e parë e Laçit për këtë sezon, pas 8 javësh pozitive. Madje kjo humbje vjen si “e rënë më sysh” për kurbinasit, të cilët ishin shndërruar në “mace e zezë” për rivalët e tjerë të Superiores dhe në fundin e kësaj faze të parë, e vetmja skuadër që ndaj së cilës nuk morën rezultat pozitiv ishte pikërisht Teuta. Me daljen e Xixhës me karton të kuq nuk pati më histori.

Teuta shënoi fillimisht me Latifin, në minutën e 15-të, dhe më pas me Prognin në minutën e 25-të. Pjesa e parë u mbyll 0-2 për durrsakët, që shtruan kështu rrugën e fitores në këtë ndeshje. Laçi u përpoq të bënte diçka të veçantë në pjesën e dytë por nuk kishte as strategjinë dhe as forcën për të bërë ndryshimin. Dhe postulati “kur nuk shënon do e pësosh” nuk vonon të kujtohet dhe në këtë ndeshje.

Kjo, pasi vjen momenti i minutës së 72-të ku Latifi shënon golin e dytë personal e të tretin për Teutën, e cila e fiton ndeshjen thellë 3-0. Vetë Amadu Latifi merr kreun e listës së golashënuesve me 6 gola, duke lënë në vend të dytë një tjetër afrikan, Rexhinaldon e Kukësit.

Kampionati Kombëtar

i Futbollit 2018-2019

Kategoria Superiore

Java e 10-të:

Të shtunën:

Kastrioti – Kukësi      1-2

Laçi – Teuta               0-3

Të dielën:

Skënderbeu-Kamza            (14:00)

Partizani-Luftëtari    (17:00)

Të hënën:

Flamurtari – Tirana   (18:00)

Renditja

1. Partizani 19
2. Skënderbeu 17
3. Kukësi 16
4. Laçi 16
5. Teuta 14
6. Flamurtari 11
7. Tirana   8
8. Kamza   7
9. Luftëtari   6
10. Kastrioti 4