ASNN – Anglia i jep “leksion” Spanjës, e mund 3-2 dhe komplikon renditjen në grupin 4 të Ligës A. Spanja dhe Anglia u përballën të hënën në stadiumin “Villamarin” në Spanjë në një ndeshje mjaft të rëndësishme në kuadër të grupit të katërt të Ligës A të Ligës së Kombeve. Anglia regjistroi një fitore të madhe, megjithëse me vështirësi, sepse e mundi skuadrën “e kuqe” brenda në fushën e saj.

Përcaktuese ishte pikërisht pjesa e parë, ku Rahim Stërlingu, me dy gola në minutën e 16-të dhe të 38-të, si dhe një gol i Markus Rashfordit, në minutën e 30-të, e çuan përfaqësuesen e “Tre Luanëve” në pushimin e ndeshjes me një epërsi 3-0, duke i shkaktuar Spanjës një tronditje të thellë. Mbrojtja spanjolle gaboi dhe anglezët në kundërsulm e shfrytëzuan mirë dobësinë, duke shënuar gola me vlerë.

Në pjesën e dytë skuadra e trajnerit Luis Enrike e stabilizoi lojën dhe nisi të mendonte më shumë për sulmin. Lojtari i momentit në Evropë, Alkaser, ngushtoi diferencën në 3-1 në minutën e 59-të, duke rihapur mundësinë e reagimit për vendasit, por anglezët nuk lanë hapësira dhe ngushtuan rrethin e sulmit spanjolle në kufijtë e zonës. Në minutën e 90-të, kapiteni Serxhio Ramos shënoi golin e dytë.

Por nuk kishte më kohë për më shumë e për pasojë takimin e fitoi Anglia 3-2, duke i dhënë “leksion” Spanjës brenda në fushën e saj. Më poshtë jepen rezultatet e ndeshjeve të Ligës së Kombeve, të zhvilluara të hënën në mbrëmje:

Liga e Evropës

Liga A

Grupi 2

Islandë – Zvicër                                             1-2

Grupi 4

Spanjë – Angli                                               2-3

Liga B

Grupi 3

Bosnjë-Hercegovinë – Irlandë e Veriut     2-0

Liga C

Grupi 2

Estoni – Hungari                                           3-3

Finlandë – Greqi                                           2-0

Liga D

Grupi 2

Bjellorusi – Moldavi                                      0-0

Luksemburg – San Marino                         3-0