ASNN – Shqipëria e Nën-19-vjeçarëve pëson humbjen e dytë në grup, këtë herë i japin “leksione” moshatarët sllovakë. Kuqezinjtë e vegjël pësuan disfatën e dytë në grupin e tetë eliminator në kuadër të Eliminatoreve për Evropianin e kësaj grupmoshe. Dueli që u zhvillua në stadiumin “Niko Dovana” të qytetit të Durrësit dhe u soll për sportdashësit drejtpërdrejt nga Rrjeti i Radio-Televizionit Shqiptar nuk pati shumë histori, sepse vetëm në pjesën e parë u shënuan tre gola.

Ishte pikërisht Kmeti që realizoi në minutën e 6-të dhe të 30-të, ndërsa Kadaku realizoi golin e tretë në minutën e 32-të. Shqipëria pati një shans të kthehej në lojë me një 11-metërsh në minutën e 33-të, por gjuajtja e Pashës u prit nga portieri mik sllovak. Në pjesën e dytë nuk pati ndryshim rezultati, edhe pse Shqipëria e nën 19 vjeçarëve iu afrua shumë golit, duke goditur edhe shtyllën.

Por kjo nuk mjafton dhe Sllovakia e Nën-19 vjeçarëve fitoi 3-0, duke marrë kreun e  këtij grupi eliminator. Kurse Shqipëria e 19-vjeçarëve mbetet në vend të fundit me 0 pikë. Trajneri Erjon Bogdani dështon të kalojë kështu të kalojë me skuadrën e tij në fazën tjetër, të njohur si “Elite Round”, pavarsisht rezultatit që mund të prodhojë ndeshja e fundit në grup përballë Norvegjisë, kuqezinjtë sërish nuk arrijnë të shkojnë më tej.

Më 10 tetor, kuqezinjtë e vegjël kishin pësuar disfatë 1-0 përballë moshatarëve të tyre ukrainas. Dy humbje në dy ndeshje janë rezultat që flet vetë, megjithë përmirësimet në lojë në shumë aspekte. Edhe Kombëtares së nën-19 vjeçarëve u mungon goli, njëlloj sikurse dhe me skuadrat e tjera kombëtare që kanë dobësi në repartin sulmues dhe me elementin finalizues.