ASNN – Ikën shqiptarët-ikën edhe medaljet, peshëngritja greke nuk njeh më një sukses të madh në rang ndërkombëtar. Midis viteve 1992 dhe 2005 për plot 13 vjet me radhë, shqiptarët i dhanë Greqisë medalje të shumta botërore e olimpike. Natyrisht, kjo u mundësua nga një kontingjent sportistësh që kishin dalë nga klubet e Shqipërisë dhe ekipet e saj kombëtare, por që frytet ia morën grekët. Kujtojmë këtu grupin e shtangistëve të shquar, kryesuar nga Pirro Dhima, i cili i dha Greqisë 4 medalje olimpike, 3 ari e një bronzi.
Ai e nisi me medalje ari në Olimpiadën e Barcelonës në vitin 1992, më pas vijoi me të artën në Olimpiadën e Atlantës në SHBA në vitin 1996, për të shkruar një tjetër sukses historik në Olimpiadën e Sidnejit në Australi në vitin 2000, po medalje ari, dhe për ta mbyllur në vitin 2004 në Olimpiadën e Athinës kur fitoi medaljen e bronztë. Për Greqinë kanë garuar dhe kanë fituar medalje edhe Luan Shabani, Viktor Mitro dhe Agron Xhelili. Po për Greqinë, ka luajtur dhe fituar medalje botërore edhe hedhësja e shtizës Mirela Manjani.
Të gjithë këta shqiptarë. Natyrisht, në fillim u panë si tradhtarë në opinionin sportdashës shqiptar, por ky grup sportistësh ka qenë vazhdimisht urë lidhëse midis sportit të të dy vendeve. Ky është një konstatim i pamohueshëm dhe këtë e forcon më shumë fakti se Shqipëria ende dhe sot ka kampionë të mëdhenj si Erkand Qerimaj, Daniel Godelli e Briken Calja, ky i fundit kampion i trefishtë i Europës. Sepse shtanga ka taban në Shqipëri dhe vijimësi. Kampionët e mëdhenj të peshëngritjes në Ballkanin Perëndimor duhen lidhur me shqiptarët dhe grekët duhet ta kenë kuptuar këtë, edhe pse, zilia e tyre mohon edhe faktet që të nxjerrin sytë
Fakt është se Greqia nuk fiton një medalje të rëndësishme ndërkombëtare që kur nga pedana zbritën sportistët e mëdhenj shqiptarë. A ka Greqia sot ndonjë shtangist olimpik, kampion bote apo Evrope? Asnjë, sepse ata që i fituan medaljet ishin të gjithë shqiptarë. Me largimin e shqiptarëve, mbaruan dhe medaljet, të cilat tani Athina i sheh vetëm në ëndrra dhe në kronikat televizive nga e shkuara e lavdishme, një e shkuar që kishte gjak shqiptari në sukseset e peshëngritjes greke.
