ASNN – “Ferrari” u duk se kishte epërsi në betejën për titull gjatë mesit të sezonit, por gjithçka më pas “e mori lumi”, pasi një sërë gabimesh të pilotëve dhe të skuadrës, i hapën derën “Mercedesit” dhe Ljuis Hemiltonit të fitojë 6 nga 7 garat e fundit. Por Sebastian Feteli thotë se synimi i “Ferrarit” për garat e mbetura të 2018-ës në Formula 1 është që të dëshmojë se është mjaft më i mirë sesa dështimet e garave të fundit.
Sebastian Feteli thotë se synimi i “Ferrarit” për garat e mbetura të 2018-ës në Formula 1 është që të dëshmojë se është mjaft më i mirë sesa dështimet e garave të fundit. “Ferrari” u duk se kishte epërsi në betejën për titull gjatë mesit të sezonit, por gjithçka më pas e mori lumi, pasi një sërë gabimesh të pilotëve dhe të skuadrës, i hapën derën “Mercedesit” dhe Ljuis Hemiltonit të fitojë 6 nga 7 garat e fundit.
Çmimi i Madh i Japonisë fundjavën e shkuar ishte një tjetër dështim i pafalshëm, madje bosi i “Ferrarit”, Mauricio Arrivabene e kritikoi ashpër skuadrën e tij për atë gabim të papranueshëm në zgjedhjen e gomave për një pistë të thatë gjatë provave zyrtare. Hemiltoni tanimë mund ta sigurojë titullin e kampionit të botës që në garën e radhës, atë të Shteteve të Bashkuara të Amerikës.
Edhe pse ishte fillimisht 8 pikë prapa Fetelit dhe tanimë shijon një epërsi prej 67-pikësh në vetëm 7 gara. Edhe vetë gjermani e pranoi se “Ferrari” kishte shkuar dëm një mundësi të shkëlqyer, por këmbënguli se skuadra është më e zonja sesa duket. “Unë mendoj dhe besoj që kemi një potencial të madh në këtë skuadër”, – tha piloti i “Ferrarit”.
“Padyshim, javët e fundit kanë qenë të vështira për të gjithë ne dhe nuk duhet të ishim këtu. Por ja që jemi dhe kjo ka ndodhur për një arsye. Por ne duhet të shohim përpara, sepse, edhe pse javët e fundit kanë qenë vështira, shpirti brenda skuadrës është ende i fortë dhe e gjithë skuadra ka qëndruar pozitive në gjithçka. Ne e dimë që kemi një potencial të madh dhe këtë duhet ta dëshmojmë në garat që kanë mbetur, për të treguar se jemi mjaft më të zotët se kaq”, – përfundoi piloti gjerman i “Ferrarit”, Sebastian Fetel.
