ASNN – Të shtunën e shkuar u luajt e gjithë java e 6-të e Kategorisë Superiore, me të dielën që nuk pati ndeshje, pasi, kampionati u rikthehet menjëherë këtë mesjavë, me katër sfidat e ditës së mërkurë, dhe kryendeshjen e javës, ditën e enjte. Kështu, gjithçka ka nisur me 3 ndeshjet e pasdrekes, që nisën në orën 13:45, kurse Partizani luan ndaj Teutës në orën 16:45.
Laçi u ngjit në vendin e 3-të të renditjes, pasi mundi 1-0 vlonjatët. Formacioni kurbinas mund të konsiderohet surpriza e madhe e këtyre 7 javëve në kategorinë superiore, dhe këtë e konfirmoi me fitoren e fundit ndaj Flamurtarit. Për më tepër, skuadra e trajnerit Artan Merxhushi është e vetmja pa asnjë humbje në elitën e futbollit shqiptar dhe në sfidën para publikut të shtëpisë, prevaloi me golin e Gjonit.
Ndërkaq, në atë përballje direkte që përplasi dy ekipe që luftojnë që tani për mbijetesën, Luftëtari mundi 1-0 Kamzën, duke e barazuar me pikë, por duke u ngjitur mbi të në renditje. Për të marrë 3 pikët, gjirokastritë iu falën golit të Rrapos, që mjaftoi që në qytetin e gurtë të festohej fitorja e dytë këtë sezon. Një fitore të shumëpritur që e largon skuadrën nga fundi, por më tepër largon krizën, arriti edhe Tirana
Bardheblutë fituan 3-2 në fushën e Kastriotit duke rikthyer disi qetësinë pas polemikave që shoqëruan humbjen në derbin me Partizanin dhe presionin në rritje për trajnerin Ze Maria në stol. Bardheblutë u impenjuan në një vizitë të jo dhe aq larg kryeqytetit, por morën 3 pikë në Krujë, duke iu larguar shkallëve të ulëta të renditjes dhe duke u ngjitur në vendin e 6-të, me 8 pikë të marra në 7 javë.
Pas epërsisë së përkohshme të vendasve me Bardhin, Tirana përmbysi gjithçka, teksa shënoi me Grecën dhe dy herë të tjera me Blazhevskin. Reagimi i vonshëm i Kastriotit me Shehun nuk shmangu dot humbjen e vendasve, ndërsa lëkundet stoli i trajnerit të krutanëve, Elvis Plori. Nesër, në orën 17:45, të gjithë sytë do të jenë drejt Korçës, teksa Skënderbeu pret Kukësin, në një sfidë direkte për objektivin e madh, titullin “kampion”.
Kategoria Superiore
Java e 7-të.
E mërkurë, 3 tetor 2018:
Kastrioti – Tirana 2-3
Laçi – Flamurtari 1-0
Luftëtari – Kamza 1-0
Partizani – Teuta (16:45)
E enjte, 4 tetor 2018:
Skënderbeu – Kukësi (17:45)
