ASNN – Është gara e 16-të e këtij sezoni të Formulës 1 dhe skuadrat dhe pilotët kanë zbarkuar në Rusi, në Fshatin Olimpik të Soçit. Teksa pilotët ngrohin gomat e makinave dhe moti në Soçi premton të jetë i këndshëm me diell, e për t’u shijuar përgjatë ditëve të fundjavës vetëm në Rrjetin e Radio-Televizionit Shqiptar, që do të sjellë drejtpërsëdrejti provat zyrtare të shtunën e garën të dielën.

Formula 1 i është drejtuar tanimë Detit të Zi, teksa skuadrat dhe pilotët kanë zbarkuar në Rusi dhe më saktësisht në Fshatin Olimpik të Soçit. Dhe Ljuis Hemiltoni i është drejtuar Rusisë me erën që i fryn bollshëm në vela, pasi fitoret e papritura në Itali dhe në Singapor i dhanë atij mundësinë të krijojë një epërsi 40-pikëshe në betejën për titull me Sebastian Fetelin.

Por, a do ta mposhtë ai edhe një herë tjetër rivalin gjerman dhe “Ferrarin” në Soçi? Apo ky është momenti kur “Skuderia” italiane reagon për një shans të fundit në betejën për titull? Për fat të keq, rrugës për në Soçi, gjërat nuk kanë shkuar edhe aq mirë për “Ferrarin”. Skuadra italiane supozohej të fitonte në shtëpi, por fitoi Hemiltoni dhe “Mercedesi”, ashtu sikundër ndodhi edhe në Singapor.

Dhe, sikur të mos mjaftojë kjo, radhën e ka Rusia, një pistë ku “Mercedesi” ka triumfuar në të 4 edicionet, pasi Hemiltoni fitoi në 2014-ën dhe 2015-ën, përpara se Niko Rozbergu dhe Valteri Botas të merrnin kreun e podiumit për “Shigjetat e Argjendta” në 2016-ën dhe 2017-ën. Pra, a do të jetë 2018-ta një tjetër garë për dominimin e skuadrës gjermane, apo “Ferrari” do t’i japë fund tersit?

Gjithçka mbetet për t’u parë, teksa pilotët ngrohin gomat e makinave dhe moti në Soçi premton të jetë i këndshëm me diell, e për t’u shijuar përgjatë ditëve të fundjavës vetëm në Rrjetin e Radio-Televizionit Shqiptar, që do të sjellë drejtpërsëdrejti provat zyrtare të shtunën e garën të dielën.