ASNN – Partizani është ekipi i parë finalist i Kupës së Federatës në volejboll për femra, pas fitores 3-0 (25-19, 25-17, 25-21), të arritur të premten pasdite ndaj Teutës, në ndeshje parë gjysmëfinale, të luajtur në Sallën Sportive të Lojërave me Dorë “Feti Borova”, në Parkun Olimpik të Tiranës. Skuadra “kampione” e Shqipërisë bëri një ndeshje të mirë, duke e dominuar takimin në të tri setet dhe duke e nisur me këmbën e mbarë këtë sezon të ri sportiv 2018-2019.
Edhe pse një ekip i transformuar tërësisht nga ai i sezonit të kaluar, pasi janë larguar si volejbollistet e huaja ashtu dhe ato elitare, skuadra e “kuqe” arriti të tregojë se është një grup më solid në fushë, duke mbrojtur mirë , çka ishte edhe arma kryesore në këtë triumf. Volejbollistet e trajnerit Tarja e rritën gradualisht nivelin e lojës nga seti në set, duke befasuar edhe Teutën, që çaloi shumë në fushë, sidomos në organizim.
Në finalen e kësaj veprimtarie, që organizohet nga FSHV-ja, skuadra e Partizanit do të luajë ndaj fitueses që ka dalë nga ndeshja mes Barleti Volejit dhe Tiranës. Dhe ajo është skuadra e trajnerit Hasan Gurabardhi, e cila ka triumfuar në derbin e kryeqytetit ndaj bardhebluve. Kështu Barleti Volej është ekipi i dytë finalist i Kupës së Federatës në volejboll për femra.
Kjo u zyrtarizua pas fitores 3-2 (22-25, 25-11, 25-27, 25-18, 15-13) ndaj Tiranës në ndeshjen e dytë gjysmëfinale të luajtur të premten në mbrëmje në “Feti Borova”. Një ndeshje me rivalitet dhe emocione, por edhe me luhatje të madhe në lojën e të dyja skuadrave, që treguan se ende nuk janë 100% gati për kampionatin që nis së shpejti. Dy herë Tirana kaloi në epërsi me sete dhe po dy herë u arrit nga Barleti, duke bërë që emri i fituesit të dalë në setin final.
Seti final rikthen lojën e ekuilibruar, me Barletin që nis gradualisht të shkëputet dhe pas ndërrimit të fushave dominon, duke fituar 15-13 dhe krejt takimin 3-2. Të shtunën në mbrëmje, përkatësisht në ora 18:00 dhe 20:00, do të luhen dy gjysmëfinalet e meshkujve, Erzeni-Tirana dhe Partizani-Studenti. Të gjitha ndeshjet e Kupës së FSHV-së, për meshkuj e femra, po sillen për sportdashësit drejtpërdrejt nga Rrjeti i Radio-Televizionit Shqiptar.
