ASNN – Kategoria e Parë ka luajtur të dielën takimet e fundit të javës së dytë në të dy grupet e saj dhe në grupin B, apo grupin e Jugut, sfida Besa-Apolonia u soll për sportdashësit drejtpërdrejt dhe ekskluzivisht nga Rrjeti i Radio-Televizionit Shqiptar. Në fakt, kjo sfidë ka nisur e barazpeshuar dhe do të duhen 14 minuta lojë që të shënohet episodi i parë. Atëherë kur Albi Çekiçi përfiton nga një kthim i gabuar prapa i topit nga mbrojtja fierake dhe marshon përpara, por pengohet brenda zonës në çastin e goditjes dhe gjyqtari akordon 11-metërsh dhe karton të verdhë.
Mihani godet saktësisht nga pika e bardhë dhe, përtej një goditjeje të dyfishtë të shtyllës horizontale të portës së fierakëve, topi prehet në rrjetë dhe Besa kryeson 1-0. Loja është ndezur dhe Apolonia provon, por pa e vënë shumë në provë portierin kavajas. Në fakt, 25 minutat e mbetura të pjesë së pare do të karakterizohen nga një vëllim më i madh loje i i fierakëve, që ndërtojnë dhe shkojnë dëm një numër rastesh për shënim, shumicën e kohës për mungesë qartësie në finalizim. Vetëm në minute e fundit të pjesës së pare, Apolonia ka një rast të volitshëm.
Por goditja e zgjuar e sulmuesit fierak brenda zonës nuk gjen kuadratin. Me epërsinë minimale të vendasve do të mbyllen 45 minutat e para, ndërsa në të dytat, është Besa që e nis më mirë, duke provuar me një goditje nga larg, por pa arritur të gjejë kuadratin në minutën e 50-të. Vetëm dy minuta më pas, Çekiçi shkëputet në të majtë të sulmit dhe depërton në zonë, por godet prirazi dhe portieri Rizaj mbyll me sukses, duke mbajtur të paprekur rrjetën e tij.
Gjysmëora e mbetur e ndeshjes dhe minutat shtesë do të kenë të njëjtën tablo me pjesën e parë të pasgolit, me Apoloninë më kërkuese, por të paqartë në kërkim të golit dhe me Besën të kënaqur me administrimin e rezultatit, duke u munduar t’i godasë fierakët në kundërsulm. Pavarsisht përpjekjeve të të dyja skuadrave, mbyllet me fitoren minimale të Besës kjo sfidë dhe kavajasit gjejnë fitoren e parë, pas humbjes në javën e parë, ndërsa Apolonia pëson humbjen e parë në këto dy javë kampionat.
