ASNN – Të gjitha ndeshjet e ekipit kombëtar të futbollit duhet të transmetohen në Televizionin Shqiptar, në mënyrë që publiku t’i shikojë ato falas, ka theksuar Ingrid Delterne, Drejtoresha e Përgjithshme e Transmetuesve Publik në Evropë, gjatë një interviste për Televizionin Shqiptar. “Siç dihet RTSH ka aktualisht të drejtën e transmetimit të Kupave të Botës në 2018 dhe 2022, por duhet të transmetojë edhe kampionatet evropiane të futbollit”, – ka thënë Delterne.

Transmetimi i ndeshjeve të ekipit kombëtar të futbollit duhet të jetë prioritet dhe ekskluzivitet i Televizionit Shqiptar. Kështu është shprehur Drejtoresha e Përgjithshme e Transmetuesve Publikë Evropianë, Ingrid Delterne, gjatë një prononcimi për Televizionin Shqiptar. Transmetuesi publik është shumë thelbësor për çdo vend në Evropë dhe sigurisht për Shqipërinë, sepse është një reflektim i forcës së demokracisë, ka theksuar më tej Delterne.

“RTSH-ja ka kërkuar gjithmonë të drejtat e futbollit për ekipin kombëtar të futbollit dhe mendojmë se është jashtëzakonisht e rëndësishme për ju, si për çdo transmetues publik, të shfaqë ndeshjet e ekipit kombëtar të futbollit, – ka deklaruar ajo. – Kjo sepse ekipi kombëtar përfaqëson vendin dhe mendoj se është në interes të publikut që t’i shohë falas ndeshjet e ekipit kombëtar, pra të transmetuara falas, ndaj duhet t’i keni në programin tuaj.”

“Prandaj, jemi ne proces negocimi për këto të drejta me UEFA-n për Kampionatin Evropian 2016 dhe do te ketë disa ndryshime që po i diskutojmë se si do të bëhet kjo në kanalin tuaj, ka vijuar Delterne. – RTSH-ja ka aktualisht të drejtat për Botërorin e 2018-s dhe të 2022-shit, por mendoj se është shume e rëndësishme që të keni edhe të drejtat për Evropianin në kanalet tuaja dhe kjo ishte një nga pikat që doja të theksoja.” Përfaqësuesja e lartë e EBU-së, është shoqëruar edhe nga ambasadori i OSBE-së në Tiranë, z. Florian Raunig.