ASNN – Sebastian Feteli është fituesi i Çmimit të Madh të Belgjikës në Formula 1. Piloti gjerman i “Ferrrari”-t ka zhvilluar një garë të përkryer, duke parakaluar që në fillim të saj Ljuis Hemiltonin, që u nis i pari. Feteli e ruajti kryesimin e garës deri në fund, duke i rikthyer skuadrës italiane fitoren në pistën e Spasë pas 9 vitesh. Kështu, me një garë të jashtëzakonshme që në nisje të saj, Sebastian Fetel ka arritur të fitojë Çmimin e Madh të Belgjikës, në Botërorin e Formula 1.
Piloti gjerman i “Ferrari”-t i rikthen njëkohësisht fitoren skuadrës italiane në Belgjikë, pas plot 9 vitesh. Por nisja e kësaj gare në pistën e Spasë, ka zënë fill me një aksident, në të cilin u përfshinë disa makina nga fundi. Është Fernando Alonso, të cilit i shkatërrohet plotësisht makina. Ndërsa tek makinat e para, menjëherë pas nisjes, në rrëmujë e sipër, Sebastian Feteli arrin të parakalojë Ljuis Hemiltonin, i cili nuk ka se ç’të bëjë, veçse të pranojë faktin se “Ferrari” është më i shpejtë se “Mercedes”-i i tij.
Në pistë hyn makina e sigurisë, derisa të pastrohet pista nga pjesët e mbetura nga makinat e përplasura. Pas 5 xhiros nën regjimin e makinës së sigurisë rinis gara, me një shkëputje mjaft të mirë të Fetelit. Por, në xhiron e 9-të, “Ferrari” mbetet me një makinë në pistë, pasi Kimi Raikonen detyrohet të largohet. Makina e tij, e dëmtuar që në aksidentin e nisjes së garës, nuk arrin t’i përgjigjet më. Gjatë garës së Belgjikës, pilotët zhvillojnë 44 xhiro.
E dukej se të gjitha skuadrat kishin një mendje, të kryenin vetëm një pit stop dhe kështu ndodhi. Hemiltoni hyn i pari për të ndërruar gomat në xhiron e 22-të, ndërsa Feteli në të 23-tën. Edhe pas këtyre veprimeve, renditja nuk ndryshon. Piloti gjerman i “Ferrari”-t është i pari, i dyti Hemiltoni dhe i treti Verstapeni. Megjithë përpjekjet e tij, piloti tjetër i “Mercedes”-it, Valteri Botas nuk shkon më shumë se vendi i katërt, jo që duke menduar se u nis nga vendi i 17-të.
Kjo renditje nuk ndryshon deri në përfundim të 44 xhirove. Për Fetelin, kjo është fitorja e 52-të në karrierë dhe e 3-ta në pistën belge. Në përfundim të kësaj gare, renditja për pilotë nuk ndryshon, pasi kryeson Hemiltoni, me 231 pikë, i ndjekur nga Feteli, që është afruar paksa, sepse ka 214, dhe ndiqet nga Raikoneni. Gara e ardhshme e Botërorit të Formula 1 është e ajo e Çmimit të Madh të Italisë, e cila do të zhvillohet fundjavën e ardhshme në Monza.
