ASNN – Për 3 ditë me radhë, në pishinën “Taq Dafa” të Durrësit, është zhvilluar “Teuta Cup 2018” në not. Kjo veprimtari ka qenë për herë të parë e përfshirë në kalendarin e turneve të Federatës Botërore të Notit. Pjesëmarrja ishte e madhe, teksa nuk munguan edhe rezultate surprizë. Në total morën pjesë 279 notarë, të cilët kanë qenë të ndarë në të rritur dhe të rritura.
Notarët dhe notaret ishin të ndarë në 21 ekipe që vinin nga Shqipëria, Kosova dhe Maqedonia. Përgjatë 3 ditëve sportistët testuan aftësitë e tyre dhe gjithçka u zhvillua sipas parashikimeve. Federata Shqiptare e Notit kërkon ta bëjë traditë këtë veprimtari, ndaj ishte e angazhuar maksimalisht që çdo gjë të shkonte siç duhej. Në ditën e parë u zhvilluan më pak gara, ndërsa më pas axhenda e dueleve në çdo kategori ishte më intensive.
Në përfundim së të gjithave sfidave ekipi fitues u shpall “Step Prishtina” me një total prej 34 medaljesh ari, 20 argjendi dhe 13 bronzi. Notari më i mirë në kategorinë e djemve u shpall Franc Aleksi i Studentit, me 2300 pikë FINA. Kurse, për femra, ishte Nikol Merizaj e Tiranës, me 1787 pikë të grumbulluara në total. Në përfundim të veprimtarisë u shpërndanë medaljet dhe shpërblimet financiare për fituesit përkatës.
Në nderim të presidentit të Federatës së Futbollit të Kosovës, Fadil Vokrri, është mbajtur një minutë heshtje në fillimin e garave. Presidenti i Federatës Shqiptare të Notit, Agim Çiraku, u shfaq i kënaqur me rezultatet e arritura, teksa siguroi se kjo veprimtari gjithnjë e më shumë po merr një rëndësi të madhe dhe këtë e tregojnë sportistët e të cilët morën pjesë.
