ASNN – Kanë kaluar 20 vite nga triumfi në Botërorin e Francës, kur Didië Deshomp dhe skuadra e tij arritën të triumfojnë në finale ndaj Brazilit. “Ai të magjepste me stilin e tij të lojës, – thotë Erik Kantona për Deshompin. – Karriera e tij si lojtar është e lavdishme.” Pas triumfit të atë Botëror, mesfushori trupvogël e drejtoi ekipin e tij edhe drejt suksesit në “Euro 2000”-shin. Më pas ai fitoi Ligën e Kampionëve me Olimpikun e Marsejës dhe me Juventusin.
Një nga futbollistët e atëhershëm në përfaqësuesen e Francës më 1998-ën, është edhe Fronk Lëbëf. Ai tregon për emocionet që kishte ndërsa ngrinte trofeun e Botërorit. “Pasi kam parë videot e festimit, duket që kam qenë lojtari i 5-të ose i 6-të, që prisja të merrja kupën, – rrëfen ai. – Pasi kapiteni Didië Deshomp mori kupën nga presidenti Shirak, erdhi radha ime. E ngrita lart Kupën e Botës, e putha dhe mund të them se në historinë e futbollit të Francës jam i pari lojtar që ka puthur trofeun.”
“Pashë se të tjerët nuk e kishin bërë atë, kështu që kjo gjë është shumë domethënëse për mua, – ka vijuar francezi. – Në të gjithë botën, kur punoj për “ESPN”Ë-in, kanalet amerikane apo në Azi, njerëzit thonë: Ky është Frank Lëbëf, fitues i Botërorit. Më vjen mirë sepse statusi i “kampionit të botës” na identifikon. Ne jemi “kampionë bote”, ndoshta një ditë, Franca do të ketë të tjerë “kampionë bote”, por ata nuk do të jenë asnjëherë si ne, sepse ne jemi të parët.”
Tashmë në rolin e trajnerit, Didië Deshomp, nuk arriti të triumfonte në Euro 2016, Evropianin që u fitua nga Portugalia, pikërisht në Francë. 49-vjeçari u mundua që t’i zgjidhë problemet e skuadrës, gjatë ndeshjeve eliminatore për Botërorin e Rusisë. Por, pavarsisht kualifikimit për në finale, Franca bëri disa ndeshje jo bindëse, sidomos humbja me Suedinë dhe barazimi në shtëpi me Luksemburgun. Ndërsa para dy dhjetëvjeçarëve ai ishte lojtar, tani Deshompi është trajner i Francës.
Dhe mbi supet e tij bie përgjegjësia për të arritur një tjetër sukses, me një ekip të ri në Rusi. Me Pol Pogbanë, Kilian Mbapenë, Antuan Grizmanin dhe lojtarë të tjerë të klasit botëror në dispozicion të tij, Deshompi ka mundësi për të arritur një rezultat më të mirë se çerekfinalet e Botërorit të Brazilit 4 vjet më parë. “Unë e di se çfarë do të thotë një Botëror i dytë i dështuar. Ne kemi ambicje, jemi konkurrentë, por duhet të tregohemi të kujdesshëm”, – tha Deshompi, ndërsa Franca po kryen përgatitjet për Botërorin 2018.
Vjeshtën e kaluar ai e zgjati kontratën si trajner i përfaqësueses, deri në vitin 2020, por a do të jetë në gjendje si të mbetet sërish në krye të Francës, nëse dështon sërish në Rusi? Ish-shoku i tij i vjetër në skuadrën përfaqësuese, Zinedin Zidan, është pas dere, pasi ka dhënë dorëheqjen nga posti i trajnerit të Realit të Madridit. Ndërsa në Botërorin “Rusi 2018”, Franca duhet të kalojë fillimisht grupin, ku përballë ka Australinë, Perunë dhe Danimarkën.
