ASNN – Kombëtarja shqiptare e femrave për grupmoshën e Nën-19-vjeçareve e mbylli në barazim 1-1 testin e parë miqësor me Maqedoninë. Trajneri Nevil Dede nuk kishte të plotë grupin e sportisteve. Megjithatë Shqipëria e drejtuar prej tij tregoi futboll të mirë me konceptin e duhur për të sulmuar. Edhe pse golat u shënuan në pjesën e dytë të takimit, në fraksionin e parë ishin disa mundësi të mira.
Në minutën e 13-të ishte Esi Lufo, që përballë portieres kundërshtare nuk e dërgon topin në rrjetë, duke fituar vetëm një goditje dënimi. Aksioni pasardhës me krosin në zonë sjell një tjetër mundësi shënimi. Në të 39-ën minutë, Shqipëria ndërton një aksion model me disa pasime ku marrin pjesë Sulo, Lufo dhe në fund finalizimi nga distanca, por i pasaktë, i kapitenes Levenaj.
Pjesa e dytë nis me disa zëvendësime, por edhe me lojë të mirë nga ana e vajzave kuqezi. Në harkun e 6 minutave, nga e 53-ta, deri në të 59-tën, janë dy mundësi të mira shënimi. Në fillim me Begollën dhe më pas me Lufon që nuk koordinohet si duhet. Ndërkaq, Maqedonia befason në të 62-ën minutën, kur një pakujdesi e vajzave kuqezi shfrytëzohet Zhiviku për nga mikeshat.
Megjithatë sulmet kuqezi vijojnë për të ardhur tek minuta e 89-të, kur Begolla fiton një 11-metërsh të cilën e shndërron vetë në gol. Dy minutat shtesë nuk i mjaftojnë skuadrës së drejtuar nga trajneri Nevil Dede, edhe pse tentoi deri në fund të marrë fitoren. Më datë 6 qershor 2018, Shqipëria do të udhëtojë drejt Ohrit për të luajtur sfidën e kthimit në këtë test miqësor.
Këto janë sfida të cilat vlejnë në kuadër të eliminatoreve të Evropianit 2019. Shqipëria e Nën-19-vjeçareve ndodhet në grupin 10 eliminator, përballë Holandës, Bjellorusisë dhe Polonisë.
Shqipëri – Maqedoni 1-1
Shënuese: Begallo 89’(11-m.) / Zhiviku 62’
E hënë, 4 qershor 2018, ora 17:00
në Stadiumin “Skënderbeu”, Korçë
Shqipëria: Isa, Morina, Zyba, Gila, Levanja, Rragami, Zhyrmeti, Tukaj, Zarka, Lufo, Sula. U aktivizuan: Agalliu, Niçku, Çerkini, Begallo. Trajner: N. Dede
Maqedonia: Reçi, Gegova, Josheska, Gjorgjevska, Gjorgjevia, Kotreska, Polozhani, Zhiviku, Dimoska, Dervishi. U aktivizuan: Nikolova, Petrovska, Bejtoviku, Ristovska.
Gjyqtare: E. Rusta, E. Kume, M. Salla (Shqipëri)
Kartonë të verdhë: Gegova, Polozhani
