ASNN – Skuadra krutane është e gatshme për t’u përballur sot me shkodranët, për ndeshjen e kthimit të turit të dytë të Kupës së Shqipërisë. Rezultati i arritur në ndeshjen e parë, ku skuadra kuqeblu, fitoi me rezultat të thellë, 4-0, lë pak optimizëm për ndonjë përmbysje, aq më tepër shifrat e arritura në ndeshjen e parë e zhvilluar në Stadiumin “Kastrioti”, konsiderohen të paarritshme, pavarësisht këtij fakti, drejtuesit e skuadrës krutane, pohojnë se në Shkodër do të shkojnë të ndeshen me dinjitet, pavarësisht rezultatit të arritur në ndeshjen e parë.
“Pavarsisht rezultatit të arritur në ndeshjen e parë, jemi përgatitur maksimalisht për ta përballuar me sukses ndeshjen e sotme, edhe pse ndeshemi ndaj një skuadre që konkurron në Kategorinë Superiore, do të mundohemi të zhvillojmë një ndeshje dinjitoze”, – do të shprehej mes të tjerash, autori i golit të vetëm që i dha javën e shkuar trepikëshin e parë në kampionat, Sokol Tali, që ka disa sezone që mbron ngjyrat e skuadrës krutane. Ka shumë mundësi që në ndeshjen e sotme, trajneri Alert Alcani, i cili e ka ndeshjen e parë në pankinën krutane, të zbresë ë fushën e lojës me formacionin e tij më të mirë.
Sipas burimeve pranë skuadrës mësojmë se sulmit do t’i besohet Bakiut, Gurit dhe Talit. Ndërsa mesfusha si zakonisht do të përbëhet nga Bytyçi, Pengili, Shaba dhe në mbrojtje do të rreshtohen Caca, Ndoni, Hoxha, Stafa. Portën, si zakonisht, do ta mbrojë Cali. Në pamje të parë, ku mendon se në fushën e lojës, trajneri Alcani do të hedhë në fushën e lojës formacionin e parë, të krijohet mendimi se skuadra krutane do të luftojë seriozisht për ndeshjen e Kupës.
Por, në realitet, skuadra krutane është përqendruar te ndeshjet e kampionatit dhe më saktë te ndeshja e radhës, që do të luhet në fundjavë në fushë të huaj, ndaj Adës së Velipojës. “Ndeshja ndaj Adës mbetet prioriteti ynë. Do të jetë një ndeshje mes rivalësh. Kam besim që do ta kalojmë me sukses, pasi skuadra pas fitores së arritur ndaj Burrelit, ka krijuar një tjetër atmosferë”, – përfundoi sulmuesi nga Fushë-Kruja, Sokol Tali, i cili luan për ngjyrat e skuadrës krutane.
