ASNN – “Amerikanizohet” volejbolli dhe basketbolli. Kështu Presidenti i Republikës së Shqipërisë, Ilir Meta, me numër dekreti 10783, më datë 17 maj 2018, i ka dhënë pasaportën shqiptare Olivia Haltasit dhe Nikia Uidhërsit. E para ka luajtur në skuadrën e Universitetit të Manhatanit, kurse e dyta në atë të Kalifornisë së Jugut, pjesë e së cilës është dhe organizatorja e Shqipërisë në volejboll për femra, Sindi Marina.
Të dyja janë lojtare që luajnë në pozicionin numër 4, apo atë diagonal me pasin, për të cilën Shqipëria në volejboll për femra, përtej përvojës së kapitenes Arjola Prenga, ka ende nevojë. Në fakt, edhe pse dekreti ka dalë më 17 maj, Uidhërs nuk është përfshirë në kombëtare për ndeshjen me Gjeorgjinë dhe Austrinë. Sikundër nuk do të jetë as sot në përballjen e tretë ndaj Izraelit.
Madje Uidhërs është e vetmja lojtare e federuar në Federatën Evropiane të Volejbollit (CEV), kurse Haltas do të mund të jetë pjesë e skuadrës ndoshta në Lojërat Mesdhetare “Tarragona 2018”, apo dhe në Eliminatoret e Kampionatit Evropian, që nisin në gusht. Uidhërs vazhdon stërvitjen për të qenë e gatshme sa herë të ketë nevojë trajneri Altin Martiri.
Ndërsa Shqipëria e volejbollit, sidomos tek femrat, ka qenë gjithnjë në kërkim të lojtareve të huaja për t’i natyralizuar. Është tentuar sivjet me venezuelianen Shakoa, apo dhe brazilianen De Oliveira, që ishin pjesë e Partizani, apo dhe organizatoren braziliane të sezonit të kaluar, Melisa Romano Ortega. Por, duket se tashmë janë gjetur dy amerikane, njëra prej të cilave, Uidhërs, mund të jetë efikase në ndeshjet në vijim.
