ASNN – “Nuk mund ta quaj surprizë këtë paraqitje të Erzenit, sepse kemi një vit që stërvitemi seriozisht dhe është në krye të kampionatit, – ka deklaruar trajneri i Erzenit, Ben Sako, pas triumfit të skuadrës së tij në sfidën e parë të finaleve të Kampionatit Kombëtar të Volejbollit për Meshkuj.

“Edhe Kupën e Shqipërisë që fitoi skuadra e kundërshtare e ka fituar jo me Erzenin, por me një tjetër ekip, i cili është nën nivelin tonë, – ka vijuar ai. – Duke mbetur tek ndeshja e djeshme, skuadra tregoi një karakter shumë të fortë si ata që luajtën, por dhe pjesa e lojtarëve rezervë.”

“Unë gjej rastin që ta falënderoj skuadrën time, sepse ka punuar gjatë gjithë kohës seriozisht dhe ishim përgatitur për këtë ndeshje finale, pasi dihet që janë 50/50. Ne luajtëm më mirë, duruam më shumë dhe treguam moral më të lartë dhe fituam ndeshjen”, – ka theksuar në mbyllje trajneri i Erzenit, Arben Sako.