ASNN – Kanoe mund të jetë disiplina më e re sportive në vendin tonë. Presidenti i Federatës Evropiane të Kanoes, Albert Uds, së bashku me Sekretarin e Përgjithshëm Branko Lovric dhe anëtarin e bordit ekzekutiv, Andrej Jelenc, të shoqëruar nga Presidenti i Federatës Shqiptare të Kanoes, Sokol Topçiu, kanë vizituar ditët e fundit Shqipërinë. Madje, ata janë pritur nga presidenti i Komitetit Olimpik Kombëtar Shqiptar, Viron Bezhani, zëvendëspresidenti i Komitetit Olimpik Kombëtar Shqiptar, Vojo Malo, dhe Sekretari i Përgjithshëm i Komitetit Olimpik Kombëtar Shqiptar, Stavri Bello.
Për Bezhanin është shumë e rëndësishme kjo ndihmë që po i jepet zhvillimit të kanoes në Shqipëri. “Ne shpresojmë në këtë rritje të bashkëpunimit për zhvillimin e këtij sporti në vendin tonë. Jemi shumë të kënaqur për këtë takim, që do të jetë një shtysë e madhe për zhvillimin e kanoes”, – theksoi Bezhani. Ndërkohë Uds, pasi ka shprehur falënderimet e tij për mikpritjen, ka shprehur idetë e tij rreth zhvillimit të kanoes në vendin tonë. “Ndihem mirë sepse jam këtu dhe falë presidentit të Federatës Shqiptare të Kanoes, Sokol Topçiu, që flet dhe greqisht”, – ka thënë ai.
“Ne mundet që disa varka, të cilat janë në Beograd, t’i sjellim këtu, – ka vijuar Udsi. – Së dyti, kjo dhe nëpërmjet Solidaritetit Olimpik, të ofrojmë kurset për kualifikimin e trajnerëve. Pa thënë që mund të përfitohet dhe ndonjë fond financiar nga Federata Botërore e Kanoes. E rëndësishme që kanoe të shndërrohet në sport popullor, ashtu sikurse është.” Për Topçiun, Shqipëria i ka shanset për zhvillimin e kanoes, sepse ka resurse jo vetëm në ujëra të bardha, por dhe në det.
“Ne duhet të bëjmë çmos që ta kemi këtë sport në shkolla 9-vjeçare dhe të mesme për të shkuar më pas në përfitimin e sportistëve për të zhvilluar kampionatet kombëtare. Shpresojmë që gjithçka të shkojë mirë”, – ka thënë ai. Dhe, në fund, vjen dhe ideja e Sekretarit Bello, që është zhvillimi i Kampionatit Kombëtar përurues në ujërat e Liqenin Artificial në kryeqytet. Në këtë mënyrë, kanoe është gati për të hyrë si disiplinë e re në sportin shqiptar.
