ASNN – Federata Shqiptare e Alpinizmit ka zhvilluar veprimtarinë e dytë kombëtare për vitin 2018. Pas ngjitjes në Malin e Skënderbeut më 14 janar 2018, alpinistët për tre ditë kanë qenë në zonën e Valbonës, ndërsa të dielën e 11 marsit 2018 kanë pushtuar majën e Boshit e lartë 2414 metra. Sipas informacionit që ka përcjellë Sekretari i Përgjithshëm i Federatës Shqiptare të Alpinizmit, Ilirjan Çule, në kushtet e një moti shumë të bukur dhe nën majën e alpeve, ndërsa nën rrezet e diellit shkëlqente dhe velloja e bardhë e borës, 95 alpinistë kanë marrë pjesë në këtë veprimtari për të arritur në majën e Boshit.
14 shoqata janë përfaqësuar në këtë veprimtari, ndërsa të premten e 9 marsit ata janë grumbulluar në fushën e Gjësë. Më 10 mars, në ora 05:00 të mëngjesit, nisën ngjitjen drejt majës së Boshit. Drejtuesit e veprimtarisë, pasi janë siguruar se të gjithë kanë bazën e nevojshme, kanë nisur lëvizjen drejt majës, ndërsa janë kryesuar nga Fisnik Muça dhe presidentit të Federatës Shqiptare të Alpinizmit, Jani Ziso. Në nisje kanë qenë vetëm 73 alpinistë, por vetëm 63 alpinistë, pas 6 orësh, kanë arritur në majën e Boshit. Në fakt grupit i është dashur 12-13 orë për të mbërritur në destinacion. Ky është numri më i madh i alpinistëve që arrijnë maja të tilla.
Ekipet pjesëmarrëse ishin “High Albania” me 16 alpinistë, Kosova me 12 alpinistë në majë, Shoqata e Skautistëve dhe Alpinistëve “Kruja”, Shoqata “Alpet Shqiptare”, Shoqata “Alpin Partizani”, Shoqata “AST Elbasani”, Shoqata Alpino-Turistike “Vlora”, Shoqata “Rock Tirana”, Shoqata “Tërbuni”, Shoqata “Taraboshi, Shoqata Gjirokastra, Shoqata Alpino-Turistike “Përmeti”, “Tomori” dhe “Valbona”. Për t’u theksuar është fakti që Taraboshi dhe Gjirokastra janë për herë të parë në këto veprimtari, sepse janë anëtarët më të rinj të Federatës Shqiptare të Alpinizmit.
Në përfundim presidenti i Federatës Shqiptare të Alpinizmit, Jani Ziso, ka shpërndarë diplomat për ata që arritën në majën e Boshit, ndërsa zbutja e borës ka vështirësuar zbritjen e tyre. Megjithatë aktiviteti u mbyll me sukses dhe tashmë alpinistët do të përgatiten për ngjitjen shkëmbore në verë.
