ASNN – Gara e çiklokrosit, e njohur ndryshe si “Shtegu i Gjelbër”, është zhvilluar të dielën me praninë 100 garuesve. Kjo garë ka përshkruar një itinerar prej 63 km, ndërsa për Kryetarin e Bashkisë së Tiranës, Erjon Veliaj, kjo është nisja më e mirë për një vit të ri. Fitues, për të dytin sezon radhazi, u shpall malazezi Demir Muliç.

Është zhvilluar sot në kryeqytet gara e “Shtegut të Gjelbërt”, e cila, në këtë edicion të 3-të ka sjell një numër risish dhe një pjesëmarrje rekord prej 100 garuesish. Kjo garë ka nisur nga Sheshi “Skënderbej” dhe pjesëmarrësit kanë përshkruar një itinerar prej 63 km.

Për Kryetarin e Bashkisë së Tiranës, Erjon Veliaj, kjo është nisja më e mirë për një vit të ri. Për organizatorët e kësaj gare të çiklo-krosit, Fondacionin EDS, nisma të tilla e bëjnë kryeqytetin më të bukur dhe më të shëndetshëm. Pjesëmarrësit në këtë garë kanë variuar nga të gjitha moshat, ndërsa ka patur edhe konkurrentë të huaj.

Në përfundim të garimit, vendin e parë e fitoi malazezi Demir Muliç, i cili i përshkoi 57 km e kronometrimit në 2 orë, 50 minuta e 52 sekonda. Ai la prapa dy çiklistët shqiptarë, Orgest Noka dhe Gëzim Bali, ndërsa në përfundim të garimit, ai shprehu kënaqësinë e mbrojtjes së titullit të fituar vjet.

“Jam shumë i kënaqur me triumfin për të dytin vit radhazi dhe duhet theksuar se këtë radhë, fitorja ishte disi më e lehtë edhe për shkak të kushteve të favorshme atmosferike, por edhe për shkak të njohjes së terrenit, – ka thënë Muliçi. – Përgëzimet e mia shkojnë për organizatorët, që këtë radhë kishin bërë një organizim të shkëlqyer të garës, ndërsa edhe itinerari ishte i parametrave ndërkombëtarë.”

“Do të vij prapë në Shqipëri dhe në Tiranë dhe jo vetëm për të garuar, por edhe për turizëm”, – ka përfunduar fituesi i edicionit të 3-të të “Shtegut të Gjelbër”. E gjithë kjo garë e ka shndërruar një pjesë të Sheshit “Skënderbej” në kryeqytet në një festë familjare dhe sportive për të gjithë pjesëmarrësit.