ASNN – Në shtator të këtij viti, Federata Shqiptare e Volejbollit do të jetë organizatore e fazës finale të Kampionatit Evropian të Volejbollit për grupmoshën e Nën-19-vjeçareve, turne që do të zhvillohet në Tiranë, nga data 1, deri më 9 shtator 2018 e ku do të marrin pjesë 12 ekipet më të mira evropiane, njëra prej të cilave është edhe kombëtarja kuqezi e kësaj grupmoshe.
Për të bërë një paraqitje sa më dinjitoze në këtë Evropian, Federata Shqiptare e Volejbollit, në bashkëpunim me stafin drejtues të ekipit kombëtar, ka vendosur të organizojë disa grumbullime për përzgjedhjen e elementit më të mirë të kësaj moshe. Këto përzgjedhje, të cilat do të udhëhiqen nga trajneri i ekipit kombëtar të Nën-19-vjeçareve, Roland Tarja, do të zhvillohen në 4 qytete.
Aty do të testohen volejbollistet që luajnë në kampionatet kombëtare të moshave. Testimi do të prekë të gjitha ekipet, në çdo cep të Shqipërisë, ndaj të gjitha klubet janë njoftuar të marrin pjesë me elementët më të mirë të tyre. Në këtë fazë përzgjedhëse janë thirrur rreth 120 volejbolliste shtatlarta të datëlindjes 2000, por jo vetëm, pasi të gjitha lojtaret që synojnë të luajnë në kombëtare do të kenë shansin të testohen.
Presidenti i FSHV-së, Erlind Pëllumbi, së bashku me stafin e FSHV-së do t’i ndjekë nga afër këto grumbullime. Ato do të nisin sot në Tiranë dhe më pas do të spostohen në Krutje, Vlorë e Pogradec. Sipas kalendarit të ndërtuar nga Federata Shqiptare e Volejbollit, sot nga ora 12:00, deri në 14:30 në palestrën e Klubit Shumësportësh “Partizani” janë ftuar lojtaret e Partizanit, Dinamos, Tiranës, Tirana Volej, Duka Volejit, Vllaznisë, Besëlidhjes, Mirëditës dhe Korabit.
Më 12 janar 2018, në ora 15:00, në Krutje do të jenë në provë lojtaret e Apolonisë 1 dhe 2, Lushnjës dhe Divjakës. E po më 12 janar 2018, në ora 18:30, në Vlorë do të testohen lojtaret e Flamurtarit 1 dhe 2, Vlora Volejit dhe Himarës. Dhe kjo fazë përzgjedhëse përfundon më 13 janar 2018 në Pogradec, teksa do të jenë lojtaret e Pogradecit, Skënderbeut dhe Elbasanit.
