ASNN – Sporti po shikohet gjithnjë e më tepër si një mundësi e mirë e promovimit të potencialeve turistike të një vendi dhe kështu ka ndodhur edhe me Aeronautikën, e cila në 2017-tën ka patur një vit tepër të ngjeshur e të suksesshëm. Falë një bashkëpunimi mjaft të suksesshëm me Rrjetin e Radio-Televizionit Shqiptar, të gjitha veprimtaritë madhore të saj, janë sjellë për shikuesit drejtpërdrejt nga transmetuesi publik.
2017-ta mund të quhet padyshim viti i aeronautikës shqiptare, sepse, edhe me përkrahjen e një gjigandi mediatik si Rrjeti i Radio-Televizionit Shqiptar, ky sport ka kapur qiellin… në kuptimin e vërtetë të fjalës. Gjithçka nisi me nënshkrimin, në fund të marsit, të kontratës midis transmetuesit publik dhe Federatës Shqiptare të Aeronautikës, për mbulimin e drejtpërdrejtë të Kampionati i 9-të Botëror të Aeronautikës në disiplinën e Fluturimeve të Lira me Precizion, që u zhvillua në Vlorë nga data, 5 deri më 14 maj 2017.
Plot 147 sportistë nga e gjithë bota do të zbarkonin në qytetin bregdetar, për një Kampionat Botëror që do të merrte vlerësimin maksimal edhe të Federatës Botërore të Aeronautikës. Në fakt, edhe ky transmetim pa ndërprerje në kanalin RTSH Sport, por, me alternime edhe në RTSH 1 HD, ka qenë një risi në vetvete sa i përket regjisë televizive.
Sepse ka ofruar pamje spektakolare të rivierës shqiptare edhe nga kamerat portative të garuesve, por edhe në koment dhe me lidhjet direkte nga Vlora. Në fakt, kjo ka qenë jo vetëm një veprimtari sportive me kujdesin e vecantë të Federatës Botërore të Aeronautikës, por edhe një mundësi e artë për promovimin e turizmit shqiptar dhe bukurive që të ofron riviera e bregdetit shqiptar.
Sporti po shikohet gjithnjë e më tepër si një mundësi e mirë e promovimit të potencialeve turistike të një vendi dhe kështu ka ndodhur edhe me Aeronautikën. Dhe pasi ka organizuar në maj Kampionatin Botëror të Aeronautikës në disiplinën e Fluturimeve të Lira me Precizion, Federata Shqiptare e Aeronautikës ka organizuar në Vlorë edhe Kampionatin e 7-të Kombëtar të kësaj disipline.
Vijon nesër…
