ASNN – Humbja e Tiranës në Ligën Ballkanike nuk është më lajm,ndërsa ndaj Blokotenas disfata ka qenë më shumë se sa e paralajmëruar. Me një sallë sportive krejtësisht të boshatisur, edhe pse çmimi i biletës ishte i ulët, Tirana e ka pasur shumë të vështirë të përballojë kryesuesit e Ligës Ballkanike. Maqedonasit e Blokotenas janë shkëputur që në fillim, ndërsa në pjesën e parë kanë fituar 26-19.
Nuk tolerojnë për asnjë çast as dhe në të dytën e duke fituar 27-10 në pushim janë në një epërsi prej 22 pikësh diferencë, 29-53. Është 13-22 pjesa e 3-të dhe Blokotena ka thelluar në 42-75. Mundohen bardheblutë të ngushtojnë diferencën e pikëve në pjesën e katërt, ndërsa e kanë fituar atë 25-17, por humbja nuk është mënjanuar. 92-67 për Blokotenan, kurse Tirana pëson humbjen e 5-të.
Edhe pse është në vendin e 4-t në renditje, përsëri është e rrezikuar për të mos qenë në “play-off”-in e Ligës Ballkanike. Tashmë Tirana kthehet në parket më 24 janar 2018 në Ligën Ballkanike, teksa do të jetë në vizitën e Prizrenit ndaj Bashkimit, kurse më 30 janar 2018 do të ketë përballë në Sallën e Lojërave me Dorë “Feti Borova” në Parkun Olimpik të Tiranës, bullgarët e Akademik Bulteks 99.
Në një statistikë të thjeshtë, vetëm në 3-pikësha maqedonasit kanë qenë dominues për të marrë ndeshjen, ndërsa kanë realizuar 10 nga 19 tentativat, ose 52.63 % të goditjeve. Kurse Tirana ka realizuar pesë nga 20 tentativa ose 25 %, që do të thotë se ende nuk është gati për t’u përballur në Ligën Ballkanike, edhe pse është në vitin e saj të dytë në këtë veprimtari.
Humbja ka shumë shkaqe, por mbi të gjitha reflekton nivelin e basketbollit shqiptar. Ndaj dhe Tirana nuk arrin të marrë më shumë se sa dy fitore, teksa pjesën tjetër e ka disfatë. Kështu ishte dhe me Blokotenan…
Tirana – Blokotena 67-92
(19-26, 10-27, 13-22, 25-17)
Tirana: Shima (15), Hysenagolli (19), Bërçkov (12), Stroubridxh (4), Abdul Basit (7) / Karaj (8), Vogli, Lasku, Strazimiri, Hysa, Gjyzeli (2), Hasani. Trajner: A. Dukas
Blokotena: Glavçev (11), Mijatoviç (15), Benjamin (18), Dujkovikj (11), Mladenovikj (4) / Kazarnovski (12), Gjuroski (8), Malori (6), Kolev (3), Avramovski (2), Lazarevski (2). Trajner: M. Ilievski
Gjyqtarë: D. Mehmeti, Xh. Mumini, D. Maxhuni (Kosovë)
“Sigal Uniqa” Liga Ballkanike
e Basketbollit – Meshkuj
Sezoni 2017-2018
Java e 8-të
(17 dhjetor 2017 – 25 janar 2018)
Rilski Sportist – Bashkim Prizren 20-0 (në tavolinë)
Tirana – Blokotena 67-92
Akademik Bulteks 99 – Ibar Rozhaje (më 25 janar 2018)
Levski Sofje pushim
Renditja
Nr. Skuadra N. F. H. Psh-Pp Pikë
- Blokotena 7 6 1 649-525 13
- Rilski Sportist 7 6 1 532-439 13
- Levski 2014 6 3 3 468-452 9
- Tirana 7 2 5 538-633 9
- Akademik Bulteks 6 2 4 493-479 8
- Bashkimi Prizren 6 2 4 366-434 8
- Ibar Rozhaje 5 1 4 393-477 6
