Tom Dumulin është fituesi i garës së kronometrit në Kampionatit Botëror të Bergenit në çiklizëm, teksa në kategorinë e profesionistëve ka fiksuar kohën 44’41”000. Pas tij me 57 sekonda e 79 të qindtat diferencë ishte slloveni Primoz Rogliç, kurse në vendin e tretë, me një diferencë prej 1 minutë e 21 sekondash e 25 të qindtat nga holandezi, ishte britaniku Kris From.
Ndërkohë Shqipëria ka pasur dy përfaqësuesit e saj, Eugert Zhupa, që prej kohësh garon si profesionist, ndërsa ka qenë edhe pjesëmarrës në Xhiron e Italisë, dhe Redi Halilajn. Halilaj ka zënë vendin e 51-të me një diferencë nga Dumulin prej gjashtë minutash e 03 sekonda e 03 të qindtat. Kurse Zhupa është i 58-ti me një diferencë nga holandezi Kampion Bote i kronometrit me 9 minuta e 15 sekonda e 43 të qindtat.
Në garën e kronometrit kanë qenë pjesëmarrës 65 çiklistë e fakti që si Halilaj, ashtu dhe Zhupa, kanë lënë të tjerë nga pas, respektivisht 7-14 konkurrentë, e bën garën e tyre të mirë dhe dinjitoze. Aq më tepër që ishin emra të mëdhenj dhe me shumë përvojë në Kampionate Botërore, Lojëra Olimpike dhe turi çiklistike. Tashmë më 24 shtator, Eugert Zhupa do të jetë përfaqësuesi i vetëm i Shqipërisë në garën e rrugës në këtë Botëror.
Ajo që nuk është përmbushur ishte objektivi i presidentit të Federatës Shqiptare të Çiklizmit, Skënder Anxhaku, për të qenë brenda njëzetëshes së parë, gjë e cila pat ndodhur në Evropian në garën e rrugës me Sefën dhe Kamberajn. Por gjithsesi, mirë dhe mjaftueshëm rezultati i Zhupës dhe Halilajt në kronometër.
