ASNN – Kuqeblutë e Vllaznisë kanë lënë pas ditët përgatitore malazeze dhe janë rikthyer sërish në qytetin e Shkodrës, duke nisur menjëherë seancat stërvitore në pritje të nisjes të kampionatit. Për ecurinë dhe efektivitetin e periudhës stërvitore që zhvilluan në kampingun e Beranes së Malit të Zi, por edhe për ecurinë që do të ketë skuadra në vazhdimësi, ka folur për mediat zëvendëstrajneri Aleksander Maxhar.

“Unë jam i gëzuar, stafi dhe lojtarët gjithashtu, – ka deklaruar ai. – Ashtu siç kemi punuar në Berane do të vazhdojmë stervitjen edhe këtu në Shkodër. Nga sot do të vazhdojmë përgatitjet edhe më fort, pasi edhe një javë fillon kampionati. Të shtunën kemi ndeshjen e fundit miqësore kundër Deçiçit dhe kjo do të jetë prova e fundit përpara fillimit të kampionatit.”

I pyetur për blerjen e fundit, Erjon Vucaj dhe në përgjithësi për merkaton, Maxhari është përgjigjur: “Jam shumë i kënaqur që është bashkuar me ne, sepse e di që është një lojtarë shumë i mire. Bashkë me lojtarët e tjerë, si Çarls, Orelesi, Lika, Hasani, etj., do të bëjnë më të mirën për ne, pasi dihen cilësitë e tyre. Sinqerisht, unë do të kisha qenë shumë i kënaqur po të ishte afruar edhe një sulmues, apo qendërmbrojtës.”

“Sepse ka nevojë skuadra për to, – ka vijuar ai. – Në qoftë se arrijnë t’i sjellin edhe këto dy lojtarë, jam i bindur se ne luftojmë për Evropë.” Zëvendëstrajneri malazez i shkodranëve ka folur edhe për ndeshjen e parë të kampionatit, atë që luhet në Lushnjë. “Normalisht që, për Lushnjen kemi filluar të mendojmë jo tani, por që para një muaji. Po bëhemi gati për atë ndeshje sepse është shumë e vështirë me një ekip debutues.”